Tomas di modupa vs mga opisyal sa barangay

CEBU, Philippines - Buot ni Mayor Tomas Osmeña nga kinahanglang dunay moimbestigar nga ahensya sa gobiyerno sama sa Office of the Ombudsman ug sa Commission on Audit kabahin sa migawas nga balitang may kahiwian sa mga transaksyon sa pipila ka mga opisyales sa barangay bisan paman iyaha kining mga kaalyado.

Giangkon sa mayor mga kaalyado sa Bando Osmeña Pundok Kauswagan nga iyang partido ang barangay kapitan sa San Roque nga si Rogelio Ruizo ug mga kagawad niini, apan dili siya modupa alang kanila kun tinuod ang maong report.

Kahinumduman nga si kagawad Lidiore Miranda misang-at og reklamo ngadto sa Visayas Ombudsman kabahin sa mga giingong anomaliya sa iyang kaubanang kagawad ug mismo sa ilang kapitan kabahin sa mga resolusyon ug transaksyon nga wala mahasubay sa tukmang proseso pagpasar.

Kini naglakip sa pagsumbong niini ngadto sa Ombudsman kabahin sa listahan sa mga nakabenepisyo sa kalihukan sa Persons with Disabilities (PWD) niadtong Hulyo 2009 sa ilang barangay.

Diha sa listahan nahibaw-an nga bisan unom ka tuig nang mitaliwan ang ilang kanhi barangay kapitan nakapirma pa ug nakadawat pa gyud kini sa gidalit nga snacks alang sa mga PWDs.

Kini gibase ni Miranda sa nakuhang record diha sa Department of Interior and Local Government sa dakbayan. Si Miranda mireklamong wala gyud kini hatagi og mga dokumento sa ilang barangay sa mga minutes sa sesyon ug meetings ug kopya sa mga nasabutan nga mao gyud untay saktong proseso. 

Hinungdan nga midangop siya sa DILG ug diha madiskubrehi ang mga kahiwian sa ilang barangay pagpasar sa mga gihulagway niyang “midnight resolutions” nga wala gani maabot sa iyang atensyon ug wala matambungi ang sesyon.

Usa ka kawani sa barangay gikatahong miangkon na kang Miranda nga maoy mimao-mao sa maong dokumento, nga susama usab sa pamahayag ni Ruizo sa unang report nga mibasol sa kasaypanan ngadto sa maong kawani.

Apan gikahibulungan ni Miranda mao nga kun gimao-mao man kini sa maong kawani nganong ang tanang kagawad gawas kaniya mipirma man sa resolusyon.

Ang maong PWD nga kalihukan migamit og P14,000 nga pundo, apan giingong wala makahinumdom si Miranda nga may susamang kalihukan nga gilusad ang barangay sa milabay'ng tuig.

Si Osmeña sa iyang bahin miingon nga angayang ibutang sa Guinness Book of Records ang nahitabo sa San Roque. Samtang naglaom ang mayor nga aksyonan kini dayon sa mga investigating agencies sa gobiyerno. (BANATNEWS)