Mga kriminal ipaapil sa gun ban

CEBU, Philippines - Gisaway ni Cebu City mayor Tomas Osmeña ang Commission on Elections (Comelec) and Commission on Human Rights (CHR) ug miawhag niini nga awhagon usab pagtuman sa gun ban ang mga kriminal.

Si Osmeña namahayag niini usa ka adlaw human sa kamatayon sa usa ka 14-anyos nga sakristan nga si Carlo Mangitngit, 14, diha sa sitio Banawa, Guadalupe human pusila sa mga tulisang nagmotor niadtong Domingo.

Ang gun ban gipatuman sa tibuok nasud nunot sa umaabot nga piniliay karong Mayo ning tuiga nga diin tanang mga tawong adunay lisensyadong armas gidid-an sa pagdala-dala niini kun walay exemptions nga gihatag sa Comelec.

Naglakip sa dili basta-bastang makadala sa ilang mga armas ang mga polis, militar, ubang law enforcement officers gawas lang kun nagtuman sa ilang mga trabaho. Gihulagway sa mayor nga pakyas ang Comelec sa pagpasunod sa mga kriminal sa total gun ban.

Gisaway usab ang mayor sa pipila ka mga tawong lakip na ang ubang mga politikong nagpunay og saway sa mga gikahadlokang “vigilantes” nga mopatay og mga kriminal, apan tak-om ang mga baba kun dunay inosenteng tawong mabiktima sa mga kriminal.

Samtang si Sr. Insp. Michael Anthony Bastes, hepe sa Theft and Robbery Section (TRS) sa Cebu City Police Office mitug-an sa mga tigbalita kagahapon nga duna na sila'y tulo ka mga witnesses, usa niini mao ang 8- anyos nga bata apan mismo ang bata wala usab makaila sa mga tulisan. Ang mga tulisan giingong pulos nagpurong sa ilang mga nawong ug nag-helmet pa gyud dihang ilang gitulis ug gipusil si Carlo Mangitngit nga gisugo pagpalit og kamunggay apan samtang nagpadulong sa tindahan nagpunay kini og text.

Ang mga tulisan nga nagmotor mihunong ug mition og armas dayong deklarar og tulis, apan human gitunol sa biktima ang Nokia 3310 niyang cellphone midagan kini hinungdan nga gipusil luyo sa ulo, namatay kini pipila ka oras diha na sa tambalanan.

Niadtong Domingo sa gabii dunay duha nga gi-pick up ang kapolisan apan human ipakita sa mga testigos gibuhian sila sanglit wala motakdo ang ilang dagway sa mga tulisan.

Si Bastes miingon hinuon nga nakig-alayon na sila sa Investigation and Detective Management Branch (IDMB) aron motabang kanila sa pagpangita og dugang mga saksi aron masulbad ang maong kaso.

Ang mga kabanay mitug-an sa kapolisan nga wala gyud mag apil-apil sa bisan unsa nga fraternity o gang ang biktima hinungdan nagtuo silang gitulis ang batan-on human gihatagan og bag-ong cellphone sa iyang igsuon nga bag-o lang nauli dinhi sa Sugbu gikan sa laing nasud. (BANATNEWS)