Villar ug GMA sekretong naghiusa

CEBU, Philippines - Nasakpan sa Liberal Party (LP) si Senador Manuel Villar sa pakig-alayon niini kang Presidente Gloria Macapagal Arroyo base sa gibuhiang pamahayag sa standard bearer sa Nacionalista Party (NP), matud pa ni LP Director General Chito Gascon.

Miingon si Gascon nga usa sa tataw kaayong kamatuoran sa panagkunsabo karon sa NP ug sa Lakas-Kampi-CMD ,ang partido sa administrasyon , mao ang pagpunay og sangyaw ni Villar nga matud pa nag-anam na ka daghan ang mga kandidato sa administrasyon nga mitipon karon sa NP ilabi na ning nagkaduol na ang election sa Mayo.

Miingon si Gascon nga bisag unsaon og pamalibad ni Villar nga walay kamatuoran ang mga taho nga may sekreto silang kadugtungan si Presidente Arroyo, apan sa iyang mga sinultihan ug mga aksyon maklaro kaayo nga namakak si Villar sa katawhan.

Gumikan niini nakaingon si Gascon nga ang isda makuha pinaagi sa iyang baba, nga sama ni Villar nga diha sa iyang baba, nasakpan siya sa mga gipamulong, matud pa ni Gascon.

Gani midugang siya nga ang mga ngilngig kaayong sinaligan ni Presidente Arroyo sama kang DILG Secretary Ronaldo Puno ug ni Presidential Political Adviser Prospero Pichay Jr. mihinayhinay na og biya kang presidential candidate Gilberto “Gibo” Teodoro sa administrasyon ug tua na karon sa NP.

Busa sa pagkakaron gumikan sa panag-uban ni Presidente Arroyo ug ni Villar, iya nang ginganlan og Villarroyo si Villar,    tungod kay alang kaniya nga bisan unsaon pagpanghimakak ni Villar nga wala siyay kadugtungan ug si Presidente Arroyo, milutaw man gyud ang kamatuoran, matud pa niya.   (Lesley Caminade)      (BANATNEWS)