Gatas magnihit

CEBU, Philippines - Gumikan sa dakong huwaw karon sa Sugbu, gikabalak-an nga maapektohan ang produksyon sa preskong gatas, matud pa sa chairman sa Cebu Federation of Dairy Cooperative (CEFEDCO) nga si Joseph Dorado.

Miingon si Dorado nga base sa ilang monitoring, aduna nay pipila ka bukirang barangay dinhi sa Sugbu nga wala nay tubig nga ikapainom sa ilang mga baka nga gatasan.

Iyang gipasabot nga aron dili mataptan og sakit ang mga baka kinahanglang limpiyohan kini pirme kada adlaw aron limpyo usab ang gatas niini ug luwas sa sakit.

Si Dorado kinsa nagduda nga molanat pa og dugay kining huwaw, nabalaka nga magnihit usab pag-ayo unya ang suplay sa preskong gatas sa baka dinhi sa Sugbo.

Ang CEFEDCO makakolekta og l,200 ka litrong gatas matag adlaw gikan sa dairy farmers apan kun motaas ang huwaw, hayan nga mokibra ang suplay niining produktoha.   (BANATNEWS)