Hapones nanion og armas gidisarmahan sa mga biktima

CEBU, Philippines - Usa ka Japanese ang nadakpan sa usa ka gwardiya ug gi-turnover sa kapolisan human nanion og armas tungod sa kahubog sa tulo ka mga lalaki kagahapon sa kaadlawon diha sa usa ka kan-anan ug imnanan nga nahimutang sa Nivel Hills sa barangay Busay ning siyudad.

Natanggong karun sa detention cell sa Cebu City Police Office (CPPO) si Masaru Chiyo Sekimata, 54, lumad nga taga Iabaraki Kenm City Japan ug temporaryong nagpuyo sa Nivel Hills.

Segun sa report sa Cebu City Mobile Group (CCMG) ang kanhi Service Security Group nga kagahapon sa kaadlawon   si Sekimata nag-inusarang nag-inom sa pikas lamesa hangtud nga nakahurot kinig pila ka botelyang beer.

Apan pagka alas 3:45 sa kaadlawon si Sekimata mibarog ug miduol ngadto sa pikas lamesa ug mibunot sa .22 revolver diha sa iyang clutch bag ug gipanglaparo sila si Evelito Toletino ,23, taga Lower Nivel Hills, usa ka 17 anyos nga lalaki ug Ruel Saladaga ,21, nga taga Nivel Hills.

Ang security guard nga si Cesar Arabis miduol ug misuway sa pag-uwang sa kasamok ug giilog ang armas ni Sekimata inabagan ni Saladaga.

Sila si PO3 Adelino Demoy ug PO3 Romeo Cardinas uban sa usa ka tanod daling miresponde sa maong alarma ug gi-turn over si Sekimata uban ang armas niini nga dunay unom ka buhing bala.

Sa gihimong follow-up sa Banat News kagahapon sa hapon nasuta nga ang tulo ka biktima mipirma og affidavit nga dili na sila interesado pa mokiha sa maong langyaw.

Apan bisan paman niini, dili gihapon makalingkawas ang maong Japanese national sanglit gihikay na sa kapolisan kagahapon sa hapon ang kasong Illegal Possession of Firearms sa Republic Act RA 8294 nga kalapasan sa Comelec gun ban. (Rey Pasaporte)    (BANATNEWS)