Sunog sa Consolacion P1.5 M ang kadaot

CEBU, Philippines - Mikabat sa P1.5 milyones ang gibanabanang kadaot sa sunog didto sa Poblacion Oriental, lungsod sa Consolacion niadtong miaging Biyernes sa gabii nga mibiktima og 10 ka pamilya.

Kini ang nasayran sa Banat News kang FO2 Jessie John Arnoco sa kabomberohan sa nahisgotang lungsod sa follow up nga gihimo kagahapon.

Si F02 Arnoco miingon nga base sa ilang imbestigasyon nga gihimo ilang nasuta nga ang kayo didto magsugod sa panimalay nga gipanag-iya ni Guillerma Zabala.

Ginama sa semi concrete ang maong panimalay ug mitapon kini sa siyam pa ka kasikbit nga mga edipisyo nga nangaugdaw usab.

Lakip sa nangaugdaw mao ang usa ka medical clinic ug internet café sa nahisgotang dapit.

Si FO2 Arnoco midugang nga may naglung-ag sa panimalay ni Zabala unya nataligam-an ug nakurat nalang ang tanan dihang kalit lang misilaob ang kayo.

Maayo nalang kay walay kinabuhing naangin atol sa maong sunog.    Mitabang usab sa pagpawong sa kayo ang mga bombero   sa Mandaue , Liloan, dakbayan sa Sugbo ug ang Filipino Chinese Fire Brigade sa dakbayan sa Sugbo.

Ang gasoline station nga nahimutang mga 300 metros nga gilay-on maoy gidepensahan pag-ayo sa mga bombero niadtong higayona. - BANAT NEWS