CEBU, Philippines - Upat ka mga mananagat nga taga dakbayan sa Talisay kinsa giingong migamit og ilegal nga panagat nasikop sa mga miyembro sa Bantay Dagat didto sa kalawran sa barangay Tulay, Minglanilla niadtong Sabado sa gabii.
Ang nagkagulkol karon sa prisohan sa Minglanilla mao sila si John Fabrica, 24, Joel Abong, 35, Randy Ranosta, 20, ug Ruben Baroquez, 18, pulos taga barangay Biasong, dakbayan sa Talisay.
Nasayran sa imbestigasyon sa kapolisan nga ang maong mga mananagat nasakpan sa akto nga migamit og liba-liba nga panagat atol sa pagpatrolya sa mga sakop sa Bantay Dagat nga sila si Dante Branza, Mario Prajes, Rolando Branza ug Rufino Toriman.
Si PO2 Humprey Alpas duty desk officer sa Minglanilla Police Station nagkanayon nga ang liba-liba usa ka matang sa pukot nga patangkilon og tingga o mga bato nga bug-at og mosudsud sa kinailadman sa dagat dayon guroyon sa fishing boat o bangka.
Busa ang tanang mga butang nga maagian niini sa ilawom sa dagat sama sa mga gasang mahabas ang tanan, busa gidili kini sa balaod.
Didto sa ilang fishing boat, ang pukot ug upat ka kilong isda nga kuha sa nahisgutang mga suspetsado, gisakmit sa mga otoridad sa Bantay Dagat.
Gitakdang pasakaan og kaso ang maong mga mananagat karong adlawa. - BANAT NEWS