Nagbisikleta nadasmagan namatay

CEBU, Philippines - Namatay ang usa ka lalaki samtang kritikal usab ang kahimtang sa iyang kapuyo human mabangga ang ilang gisakyang bisikleta sa usa ka Izusu Elf didto sa barangay Balibad, lungsod sa Sta. Fe sa miaging adlaw.

Ang namatay mao si Sergio Dela Peña, 55, samtang ang anaa sa talandugong kahimtang mao ang iyang kapuyo nga si Alicia Dela Peña, 55 nga pulos taga barangay Tinaan, lungsod sa Madridijos.

Samtang ang driver sa Izusu Elf nga nakabangga nailhan nga si Julius Sabio, 38, nga taga P. Del Rosario Extension, dakbayan sa Sugbo.

Sa pakighinabi sa Banat News ni PO2 Erick Ilustrisimo, siya mibutyag nga ang magtiayon gikang miduaw sa ilang anak didto sa barangay Poblacion, sa Madridijos, dihang sa ilang pagpauli nasugatan nila ang disgrasya.

Ang mga biktima gihatod dayon ngadto sa Bantayan District Hospital apan lima ka oras ang milabay namatay ang bana samtang ang kapuyo nga anaa sa talandugong kahimtang gidala usab ngadto sa tambalanan sa dakbayan sa Sugbo. .

Gumikan kay naareglo gipagawas dayon sa kapolisan ang suspetsado. - BANAT NEWS