CEBU, Philippines - Usa ka gidudahang konektado sa cocaine distribution dinhi sa Sugbu ang nasikop sa buybust operation sa mga sakop sa Philippine Drug Enforcement Agency-7 kagahapon.
Ang nadakpan mao si Eugenio Lastimosa Jr. nga residente sa A. Lopez sa barangay Labangon ning dakbayan ug nagtrabaho isip technician sa usa ka electrical shop sa V. Rama Avenue ug kanhi technician usab sa Criminal Investigation and Detection Group-7 kaniadto.
Ang buybust nahitabo diha sa dalan V. Rama human ang mga team sa PDEA pinangulohan ni AO3 Yogi Felimon Ruiz nakakumpirmar sa pagpamaligya og cocaine sa maong suspek.
Ang PDEA agents mipalit og balor P5 mil nga cocaine nga may gibug-atong duha ngadto sa tulo ka gramos kang Lastimosa ug dihang natigayon ang transaksyon gidakop kini sa mga ahente.
Gawas sa gamay'ng putos sa cocaine nga napalit gikan kaniya nakuha usab sa iyang posesyon ang dugang 73 gramos nga cocaine nga gisulod sa unom ka mga medium size nga pakete nga gibana-banang mobalor P400 mil ang kantidad niini.
Nagduda si PDEA-7 Director Randy Pedroso nga konektado kining maong dinakpan sa nahauna nilang operasyon inabagan sa Regional Intelligence Division nga miresulta sa pagkasikop sa usa ka drayber sa traysikol nga si Vedasto Jubahid Corsiga ug pagkasakmit sa 12 ka paketeng cocaine nga balor P720 mil sa street value sayo niining bulana.
Matud pa ni Pedroso nga mopahigayon sila og halawom nga imbestigasyon kun gi-unsa pagkuha ug si kinsa ang nagsuplay ni Lastimosa.
Si Corsiga lumad nga taga Borongan, Samar apan nagtrabaho isip drayber sa usa ka pamilya sa Bohol nakuhaan usab diha sa iyang payag sa follow-up operation sa Borongan og usa ka kilong cocaine (di shabu sa unang report) nga balor og P6 milyones.
Si Lastimosa sa iyang bahin sa pakighinabi sa mga tigbalita wala mohimakak o moangkon sa salaod nga gipasangil kaniya apan kini mibutyag nga hinatag ra ang cocaine kaniya sa iyang higala. - BANAT NEWS