3 traysikol vs. trak, usa patay, 6 'angol

CEBU, Philippines - Patay ang usa ka drayber sa traysikol ug laing unom ang nangaangol lakip na niini ang 10-anyos nga batang babaye human ang tulo ka traysikol nga ilang gisakyan gidaro sa usa ka Isuzu Elf truck niadtong Sabado sa buntag diha sa national highway sa barangay Loray 2, dakbayan sa Toledo.

Ang mga traysikol nga gidaro nagtangag sa mga plakang QM-3151 nga gimaneho ni Nicolas Laspona ; plakang 7Q-4009 gimaneho ni Jennifer Abella(lalaki); ug GZ-4606, gimaneho ni Eleno Lopez Jr., si Abella maoy nakabsan sa kinabuhi.

Sila si Gomercenda Pansalada 52, taga barangay Ilihan ug Mary Grace Ubanos, 10-anyos taga Magsaysay Hills maoy mga pasahero ni Abella.

Samtang sila si Rowena Crisostomo, 29 ug Christine de Vera, 25 parehong taga barangay Sangi, Toledo ang mga pasahero ni Laspona.

Ang trak gipanag-iya sa Telecommunication Management Services Incorporated gimaneho ni Desiderio Hibrada gi-impound na sa kapolisan.

Si SPO3 Carmelito Hornales nga nahinabi sa Banat News kagahapon nagkanayon nga si Hibrada nadetiner sa Toledo City detention cell ug mag-atubang kini og kasong reckless imprudence resulting to homicide, physical injuries and damage to properties.

Si Hornales mibutyag nga ang trak gikan sa barangay Sangi paingon unta ngadto sa sitio Lawis, barangay Loray 2 apan pag-abot diha sa lugar nga nahitaboan paglubag ni Hibrada sa manobela nag-malfunction kini.

Naharos hinuon niini ang maong mga traysikol nga iyang nakasugat ug gipangdaro ug nangalimbuwad.

Ang tulo ka drayber ug mga pasahero ang daling gidala ngadto sa Toledo City District Hospital apan si Abella kinsa nakaangkon og grabeng kadaot sa lawas wala na makaabot nga buhi ngadto sa maong tambalanan. - BANAT NEWS