Magtiayon napunggit sa trak, bana namatay

CEBU, Philippines - Patay ang usa ka lalaki samtang talandugon ang kahimtang sa iyang asawa human mabanggai ang ilang gisakyang bisikleta ngadto sa usa ka trak alas-tres sa hapon sa miaging adlaw sa barangay Balibad lungsod sa Sta. Fe.

Ang namatay nailhan nga si Sergio Dela Peña,55, samtang talandugong nalandig sa tambalanan si Alicia Dela Peña, 55, ang duha pulos taga Tinaan lungsod sa Madridejos samtang ang driver nga nakabangga nailhan nga si Julius Sabio,38, molupyo sa P. Del Rosario Extension.

Sa pakighinabi sa Banat News ni PO2 Erick Ilustrisimo mibutyag nga ang magtiayon sakay sa ilang bisikleta dihang kalit gisungag sa Isuzu Elf Van nga gipanag-iya sa Sul Corp. sa Paknaan syudad sa Mandaue.

Gikatahong parehong wala makabantay ang magtiayon nga may kasugat silang van ug nasungag, ang duruha daling gidala ni Sabio sa Bantayan District Hospital apan lima ka oras ang milabay namatay ra usab ang lalaki samtang gibalhin usab sa usa sa mga tambalanan sa dakbayan sa Sugbo ang babaye.   (Lesley Caminade)    (BANATNEWS)