CEBU, Philippines - Duha ka lalaki ang aksidenteng naigo dihang nagpasalba ang gwardiya ni Mayor Wilson Wenceslao diha sa gate sa pinuy-anan niini niadtong Biyernes sa alas 2:30 sa kaadlawon.
Ang mga naangol mao ang manag-agaw nga sila si Rey Sapio Capangpangan, 22, ug Bryan Capangpangan Perolino, 23, pulos habal- habal driver nga taga barangay Lamac lungsod sa Consolacion.
Samtang ang gitumbok nga aksidenteng nakapusil nila mao ang gwardiyang si Ramil Cabreros Estrimos, 30, sakop sa Marangal Security Agency nga magbalantay sa pinuy-anan ni Mayor Wenceslao.
Matud pa ni PO2 Edgardo Pacana sa Santander Police dihang nahinabi sa Banat News ang mga biktima nag-angkas sa motorsiklo ni Janwar Capangpangan dihang naagian sa nagpatrolyang mga polis pinanguluhan ni Insp. Avel Velasco.
Tungod kay tulo sila sa motorsiklo gisuwayan og pahunong aron sukit- sukiton apan mipasirit hinuon og padagan hinungdan nga gigukod kini sa mga polis.
Apan dihang nagpadulong na kining molabay sa atubangan sa balay sa mayor nakabantay ang gwardiya nga gigukod kini sa mga polis hinungdan nga gipasalbahan kini ni Estrimos sa iyang gidalang shotgun ubos sa yuta aron pagpahunong sa mga biktima.
Gikatahong mibanda ang bolitas niini ug adto miigo sa mga nag-angkas, si Rey kinsa naigo sa walang batiis samtang sa walang bahin sa dunggan usab naigo si Bryan.
Ang duha gidala sa Oslob District Hospital ug luwas na sa piligro samtang ang gwardiya boluntaryong mitahan sa kapolisan samtang nagpaabot sa tukmang sumbong nga ipasaka batok kaniya. (BANATNEWS)