CEBU, Philippines - Usa ka tawo kinsa giingong nagdala og P1 milyon cash giingong gisikop kagahapon sa buntag didto sa Mactan Cebu International Airport MCIA.
Apan ang direktor sa Police Center for Aviation and Security (PCAS) nga si Sr. Supt. Joselito Salido mibutyag nga nakadawat sila og taho kabahin sa maong hitabo apan dili opisyal kay wala mosugilon sa ilang buhatan ang taga Bureau of Customs kinsa giingong maoy nakasikop.
Si Salido mipasabot nga ang usa ka pasahero sa abyon Pinoy man o langyaw gitugotan lang nga makadala og P10,000 cash, ug kun kini mosubra sakmiton kini sa mga otoridad sa tugpahanan.
Ang maong balaod diha sa tugpahanan gipatuman pinaagi sa Memorandum of Agreement (MOA) tali sa Bangko Sentral ng Pilipinas sa MCIA aron kalikayan ang money laundering.
Ang usa ka pasahero nga magdala og kwarta nga P1 milyon pataas pugngan o sikopon kini sa taga Custom ug P10 mil nalay iuli ngadto sa tag-iya.
Unya na iuli ang ubang kuwarta ngadto sa tag-iya kun makasumiter siya og mga ebidensya nga ang maong kuwarta naggikan sa maayong tinubdan ug dili kay kuwarta nga gikan sa ilegal nga patigayon.
.Ang usa ka tawo nga gikan sa gawas sa nasud pwedeng magdala og dakong kantidad sa kwarta basta moagi kini sa buhatan sa Foreign Currency Declaration (FCD) office diin ipahibawo niya ang kantidad sa iyang dala aron dili kini ma-intercept.
Si Salido midugang nga paabuton niya hangtod ugma nga mohatag og opisyal nga report sa iyang buhatan ang mga otoridad sa Custom bahin sa nahisgutang insidente.
Gisuwayan sa Banat News ang pagtawag sa buhatan sa Custom sa MCIA apan walay nakatubag kagahapon sa hapon. (Brenda D. Batuto) (BANATNEWS)