CEBU, Philippines - Ang hepe sa Talisay City Police Station nga si Supt. Henry Biñas misanong sa mando ni Sr. Supt. Erson Digal, hepe sa Cebu Provincial Police Office (CPPO) nga sikupon gyud ang sinagop ni Mayor Socrates Fernandez nga si Joavan kung makahimo kini og kalapasan sa balaod gamay man o daku nga kalapasan.
Si Biñas nga nahinabi kagahapon sa Banat News nagkanayon nga tumanon niya ang mando sa iyang labaw basta dunay legal nga basehanan ug kun nakasala gyud ang anak sa mayor.
Kini maoy pamahayag ni Biñas human makontrobersya na usab ang anak sa mayor ug gipasanginlang nanghapak sa ulo sa usa ka gas boy sa usa ka gasolinahan sa Bulacao tungod sa pagdumili sa maong gas boy nga tubilan ang sakyanan kay walay gas notice.
Giawhag ni Biñas ang tanang mga naargabiyado ni Joavan nga moanha sa ilang buhatan aron pormal nga mopasaka og reklamo batok sa sinagop sa mayor tungod kay kun walay mangisog og reklamo padayon kini sa iyang paggara ug pagbuhat og mga kalapasan sa balaod.
“Hatagi og bili ang pagpangga sa imong amahan (mayor) tungod kay walay sama ang iyang pagpangga kanimo ug ang maong pagpangga dili nimo makita ngadto sa ubang mga tawo,” tambag pang Biñas.
Dili palang dugay, si Biñas gipa-blotter ni Joavan ug gipasanginlang hubog ug mi-harass kaniya diha sa buhatan sa Fisherman Sea and Ecological Care (FISECA) diha sa barangay Cansojong, gihimakak hinuon kini sa hepe sa Talisay City Police Station ug miingon nga igo ra niyang gimaymayan ang sinagop sa mayor nga tahuron ang iyang amahan ug kaluy-an niini ang mayor pinaagi sa dili na pagpabadlong.
Kahinumduman si Joavan gialarma sa mga sakop sa Special Weapons and Tactics sa Cebu City Police Office human motawag og police assistance ang gwardiya sa IAU Tower dihang giingong nasuko ang anak sa mayor nga wala pasudla ug nanawag sa cellphone nga daw nanawag og ‘backup’ ug militok nga padad-on og armalite. Wala hinuoy nakuhang armas ang kapolisan sa anak sa mayor niadtong tungura.
Niadtong Biyernes sa kaadlawon giingong gihapak ni Joavan ang ulo ni Rodel Requina tungod sa pagdumili niini og tubil sa iyang sakyanan nga iya sa amahan, si Requina ug Rolando Nara dili interesadong mopasaka og kaso. (Brenda Batuto) (BANATNEWS)