CEBU, Philippines - Dili mominos 38 ang naangol ug tulo niini ang grabe ang kahimtang sa sobra usa ka gatus ka mga 4th year Buanoy National High School nga tinun-an dihang aksidenteng nadisgrasya ang ilang gisakyan sa ilang pagpauli gikan nag recollection diha sa barangay Prenza lungsod sa Balamban niadtong Huwebes sa alas 5:30 sa hapon.
Ang mga tinun-an sakay sa trak de kargang gipanag-iya sa Metaphil nga gimaneho ni Rogelio Elizar, 55, taga Pulpogan lungsod sa Consolacion kauban sa safety officer nga si Roel Mercado.
Ang tulo ka tinun-ang seryusong naangol mao sila si Jesalei Gaid, Christine Crausus ug Rithel Tupaz pulos gidala sa pribadong tambalanan sa dakbayan sa Sugbu.
Samtang ang ubang mga naangol nga nalandig sa Balamban District Hospital mao sila si Judy Nuevo, Janice Lugay, Marry Joy Lopez, Alixa Quimp, Joy Paubsanon, Mira Morante, Sarmi Enciso, Marvin, Brasa, Jinive Geraymon, Vincent Sevilla, Charles Cortez, Annabele Conserman, Maria Chris Abadinas, RJ Tumulak, Clinton Cabonete, Arturo CAhilog, WEline Arante, Nerme Cañete, Jenny ann Orillo, Michelle Dio, Allen Sanchez, Maria Charina, Shabok, Ethel Sepada, Marivic Umayan, Aillyn Abatayo, Vincent Codaste, Lourdes Zamora, Lyn-lyn Maglasang, Lea Bohangi, Merlinda dela Cruz, Rubin Morandanti ug Sue Oldinaryo.
Matud pa ni Chief Insp. Resty Santos, hepe sa Balamban Police dihang nahinabi sa Banat News, ang mga estudyante gikan sa ilang recollection apan pag-abot sa dulhugong bahin sa dalan naabli ang sira sa luyong bahin diin nagbarog ang mga estudyante.
Sumala pa sa kapolisan nga dunay sakay nga 127 tinun-an ang maong trak ug kadtong mga nangaangol mao kadtong diha sa nabukas nga pultahan ug nangatagak.
Ang mga tinun-an pulos nakaangkon og mga samad sa kalawasan ug mga pangos, tulo ang nagrabehan.
Samtang ang drayber sa maong trak de karga temporaryong nagtingkagol sa karsel samtang gihikay ang kasong ipasaka batok kaniya. - BANAT NEWS