Nadsu, Piston miingong RFID 'pangwarta' lang

CEBU, Philippines - Subling nanawagan ang grupong Nadsu-Piston dinhi sa Sugbo kun nganong hangtud karon wala pa ihatag ang refund sa ilang gibayad nga Radio Frequency Identification tags ug nanawagan nga ibasura na kini.

Matud ni Roy Opura ang tsirman sa Nadsu-Piston sa Sugbu wala’y kaayuhan kanilang mga drayber ang RFID ug pangwarta lang kini sa gobiyerno.

“Wa’y kaayuhan nga makuha usa lang kini ka pagpangwarta sa gobiyerno aron sa pagtapak sa ilang budget deficit ingon man gamiton lang ang kwarta isip dugang budget ning umaabot nga piniliay,” sigon pa ni Opura.

Dugang niini wala usab masubay sa ensaktong proseso ang RFID kay wa’y nahitabong public bidding. Dihang ilang giimbitar ang LTO ingon man ang Stradcom aron makaesplikar sa benepisyo kalabot niini walay bisan usa ka representante ang mitungha.

Sumala pa ni Opura ang rason nga wala manambong ang maong giimbitahang opisyal mao ang pending nga kaso diha sa korte kalabot niini.

 Matud pang Opura bug-at ug hasol na kanilang mga drayber ang implementasyon niini.

Ang secretary general sa Piston ug nominees sa Anak Pawis Partylist nga nagrepresentar sa transport sector nga si George San Mateo mihulagway nga ilegal, usa ka matang sa ‘money making,’ ug dugang gasto lang, ug usa sa mga korupt nga proyekto sa gobiyerno ang RFID nga angayang ibasura.

Si Ruben Rama nga mao usab ang Secretary General sa Nadsu-Piston Cebu nagkanayon nga aduna’y mga operator dinhi sa Sugbo ang nakabayad na sa RFID sa wala pa gipagawas sa Korte Suprema niadtong buwan sa Enero ang Temporary Restraining Order (TRO) apan wala na makabawi sa maong gibayad.

Lakip sa mga mitambong sa maong forum kagahapon didto sa CENDETT ang grupong Herctoda, Pakmatoda, Lamdoa, Moodasar, Outoda ingon man Tukotoda.  - BANAT NEWS