Joavan gireklamo

CEBU, Philippines - Subling nabutang sa kontrobersya ang sinagop ni Talisay City Mayor Socrates Fernandez nga si Joavan Fernandez human gireklamong nanghasi sa mga pumpboy sa Shell Gas Station sa barangay Bulacao Talisay kagahapon sa alas 12:55 sa kaadlawon.

Si Joavan giingong mihasi sa pumpboy nga sila si Rodel Requina ug Rolando Narra, pulos taga lungsod sa Dalaguete.

Ang gwardiyang si Jondel Alcantara sa usa ka interbyu sa usa ka estasyonan sa radyo nga nakakita sa maong hitabo mibutyag nga ang insidente nakuha gyud sa ilang security camera.

Si Requina dihang gihinabi usab sa maong estasyunan mibutyag nga miabot sakay sa iyang Pajero si Joavan kagahapon sa kaadlawon ug mimando nga magpatubil og full tank.

Apan tungod kay wala kini gipakitang notisya gikan sa amahang mayor ug wala usab kini dalang kwarta nagdumili sila pagtubil niini hinungdan nga nasuko si Joavan ug giingong mihapak sa ulo ni Requina.

Kini maoy hinungdan nga mitawag sa cashier ngadto sa mayor, ang naulahi gikatahong mimando kanila nga patubilan nalang ang sakyanan niini.

Giingong dunay kasabutan ang maong gasolinahan ug mayor nga dili tubilan ang sakyanan ni Joavan kun wala kini ikapakitang note nga gikan sa amahan.

Sumala pang Narra nga nagduha-duha gyud sila pagtubil sa sakyanan ni Joavan tungod kay duna kini dakung utang kaniadto ug dugay kaayong nabayran.

Samtang gibutyag ni SPO1 Oliver Dacua sa Talisay City Police dihang nahinabi sa Banat News nga wala magpa-blotter ang mga biktima ug igo lang nangayo og police assistance.

Daghan nang higayon nga nabutang sa kontrobersya si Joavan ug ang katapusan niini sa milabay'ng semana gialarma kini sa mga sakop sa kapolisan sa dakbayan sa Sugbu human nakig-away sa usa ka gwardiya sa usa ka condominium.

Mismong si Police Regional Office-7 direktor Chief Supt. Lani-O Nerez mipahimangno na niini nga kinahanglang   mamalandong kini sa iyang kaugalingon ug respetuhon ang balaod.

Si Sr. Supt. Erson Digal, direktor sa Cebu Provincial Police Office sa pakighinabi sa Banat News mibutyag nga ‘migara’ og maayo si Joavan tungod kay walay gustong makigsumpaki niini.

“Mogara na siya sa mga tawong di mosukol niya. Kay kun naa bitaw’y mopasaka og kaso moatras ra gihapon, mao nang mogara. He is not untouchable diha sa Talisay, abi kay anak siya og mayor wala siya’y papel diha. No one is above the law, police gani dakpon siya pa kaha?” sumala pang Digal.

Si Digal mimando na kang Supt. Henry Biñas, hepe sa Talisay City Police Station nga sikupon gyud si Joavan kun kini mohimo og salaod maskin pa og unsa ka gamay.

Si opposition ug kanhi vice mayor Aberdovey Belleza sa phonepatch interview sa Balitang Bisdak nagkanayon nga isip amahan (Mayor) duna kini tulubagon, isip mayor duna usab kini tulubagon sa dakbayan.

Si Belleza wala motubag og klaro kun gamiton ba nila sa politika ang pagpabadlong ni Joavan, apan kini mibutyag nga lakip sa angayang atubangon sa mayor ang peace and order sa dakbayan ug kun ang anak niini hulga sa kahapsay ug kalinaw sa siyudad angayang atimanon kini sa mayor ug hatagan og pagtagad aron di maghatag og dugang problema.

Ang Banat News misuway og tawag sa opisina sa mayor apan ang nakatubag mibutyag nga wala pa kini makaabot samtang dili usab makontak ang duha niini ka numero sa cellphone.  - ug Brenda Batuto (BANAT NEWS)