CEBU, Philippines - Posibleng matangtang sa ilang katungdanan ang mga empleyado sa City hall sa siyudad sa Talisay kun mapamatud-an sa gipahigayong surprise drug test niadtong nakalabay’ng adlaw nga positibo sa paggamit og ginadiling drugas.
Matud pa ni Talisay City Administrator Richel Bacaltos sa interview sa DyRF nga ilang ipahamtang ang labing bug-at nga silot sa mga hiwing kawani sa gobiyerno ug kini mao ang pagtangtang kanila sa katungdanan.
Dili hinuon nila ipublikar ang resulta sa maong drug test sa higayon nga may motumaw positibo sa maong drug test ilaha dayong isunod ang confirmatory test. Si Mayor Socrates Fernandez mitukod og komitiba ug gihatagan og igong gahum sa pagpahamtang og tukmang silot apan ipasubay sa due process.
Ang maong lakang agi og pahimangno sa tanang kawani sa Talisay nga dili sila magpanukong mosilot sa mga adik nga kawani. - Chester Abadilla (BANAT NEWS)