Shabu syndicate arestado

CEBU, Philippines - Nasikop sa kapolisan ang gidudahang mga miyembro sa usa ka sindikato sa ilegal nga drugas atol sa usa ka buybust operation sa mga sakop sa Investigative and Detective Management Group nga gipanguluhan ni Supt. Paul Labra pasado alas-12 sa udto kagahapon sa dalan Spollarium, sa barangay Duljo Fatima.

Ang mga nasikop giilang sila Noel “Nimzu” Caballero Diaz, 35; Reynaldo “Jumbo” Caballero Diaz, 31; pulos taga sitio Vampire, Roland “Kerwin” Eslaban Espinosa, 30; taga Cahipa, Hipodromo; Ronnie Tomada Pocson, taga barangay Mabini syudad sa Ormoc ug Cipriano Armecin Diano, 36, taga Tinago II Benoldo, Albuera, Leyte.

Nakuha gikan sa grupo ang pito ka dagkong paketeng gidudahang shabu nga nagkantidad og P280 mil.

Nakadawat og impormasyon ang IDMB kabahin sa kalihukan ni Noel sulod sa duha ka semanang surveillance ug dihang nakumpirmar gilusad dayon ang operasyon.

Si Noel mitungha sa gikasabutang dapit luwan sa usa ka Toyota Hilux nga kolor itom nga adunay plate number ZTS-766 kauban ang upat ka mga suspek, si Noel , Pocson ug Diano maoy mikanaog. Dihang gitunol ni Noel ang ‘shabu’ giaresto kini ug mga kaubanan nga wala na makaporma dihang gialirungan sa ubang mga polis.

Nakuha diha sa mga backup ni Noel ang usa ka Taurus 45 pistol ug duha ka dagkong paketeng ‘shabu’ kang Reynaldo nga igsuon ni Noel; usa ka Norinco .45 pistol ug mga bala ingon man tulo ka dagkong paketeng ‘shabu’ kang Espinosa; usa ka Colt Defender .45 pistol ug mga bala kang Pocson; ug usa ka Colt .45 pistol ug bala kang Diano, nakuha usab sulod sa sakyanan ang usa ka dakong paketeng ‘shabu,’ang sakyanan rehistrado sa usa ka ginganlan og Alice Jean Catingub nga taga Ormoc City. Si Labra mibutyag nga notadong drug syndicate ang grupo nga gipangulohan sa usa ka Jaguar Diaz nga tua na sa Muntinlupa. Si Cebu City Police Director Patrocinio Comendador miingon nga misuway pa og sukol sila si Pocson ug Diano apan naunhan, ang duha nangangkong bodyguard sa usa ka politiko ug dunay permit to carry ang ilang armas apan dili gihapon kini excuse tungod kay nakalapas sila sa Comelec gun ban. – BANAT NEWS