CEBU, Philippines - Ang hepe sa kapolisan sa lungsod sa Minglanilla andam na sa pag-agi pag-usab sa convoy ni Presidente Gloria Arroyo sa maong lungsod kinsa mopaingon ngadto sa dakbayan sa Toledo karong adlawa.
Ang bag-ong hepe karon sa lungsod nga si Chief Inspector Jovito Canlapan sa pakighinabi niini sa Banat News kagahapon mibutyag nga karong adlawa 12 ka mga polis uban ang mga sakop sa Minglanilla Traffic Commission ug dugang lima ka polis nga Field Training Program gikan sa provincial headquarters ang motabang pagpahapsay sa dagan sa trapiko aron dili malangay ang convoy sa presidente.
Si Canlapan midugang nga ang mga signage nga gipamutang sa tunga sa karsada temporaryo una nila kining ipadaplin aron dili sagabal sa pag-agi sa presidente.
Ang mga residente nagreklamo sa kahaguka sa lokal nga kagamhanan tungod niini ug kakulang sa training sa mga sakop sa Minglanilla Traffic Commission.
Kahinumduman nga si Insp. Leoncio Baliguat Jr. narelibohan dihang ang convoy ni Arroyo nalangan padung sa Argao tungod sa kahuot sa trapiko sa milabay’ng buwan atol sa paglubong ni anhing Press Sec. Cerge Remonde, nasayran nga giuna ni Baliguat ang nagbati nga manganakay’ng asawa apan nag-monitor sa iyang mga sakop. - Brenda Batuto (BANAT NEWS)