CEBU, Philippines - Gipasilig sa Sugbuanon nga kandidato pagka-senador ang pagpreserbar sa Press Freedom Law aron kahatagan og igong proteksiyon ang mga tigbalita ug magsusulat batok sa mga pagpanghulga ug paglisudlisod sa mga tawo sa gobyerno ug sa mga politiko nga dili maka-uyon sa mga balita nga mamantala sa mantalaan ug masibya sa radyo.
Gipadayag ni Dangerous Drugs Board Undersecretary Paul Clarence Oaminal nga si kanhi Senador Vicente “Tito” Sotto III mipasalig nga magpabilin ang Akta republika 53 kon Sotto Law nga naila na nga Press Freedom Law.
Taliwala kini sa lakang sa pipila ka mga magbabalaod pagpapas niini. Kini human nakasugat og kalisdanan ang Senado pag-obligar sa mga peryodista pagbutyag sa mga tinubdan sa balita kun ipatawag sa usa ka mga senatorial fact-finding inquiry kalabot sa mga gipublikar nga mga kontrobersya nga naglambigit sa transaksiyon ug mga opisyal sa gobyerno.
Matud ni Oaminal sa dihang nahinabi sa Banat News nga ang Sotto Law mitakdo usab sa listahan sa Comelec sa mga kandidato pagka-senador sa Mayo 11 diin nahimutang siya sa ika-53 nga dapit sa tanang 64 ka mga kandidato.
Si Sotto gawas nga napili kaniadto pagka-senador sulod sa tulo ka sunodsunod nga termino, nagsilbi usab kining chairman sa DDB sa wala pa mo-resign sa dihang nakahukom nga magpapili og balik pagka-senador.
Gani si Sotto nakabungkag ug nakasikop og daghang mga buhatan sa ginadiling drugas ilabi na sa shabu sa dihang nagsilbi kining DDB chairman. - Darrel Carumba (BANAT NEWS)