CEBU, Philippines - Mipasar og resolusyon ang konseho sa lungsod sa Carmen nga nag-awhag sa Hunta Probinsyal aron ipaubos sa imbestigasyon ang gihulagway nga law-ay nga dance show nga gitawag og Carmen Rain Dance 2010 nga gipahigayon atol sa bisperas sa Sinulog sa Carmen niadtong petsa 23 sa milabay’ng bulan sa Enero.
Ang resolusyon nag-awhag sa buhatan ni bokal Agnes Magpale ang chairman sa committee on Womens sa hunta nga imbestigahan ang maong pasundayag.
Si Konsehal Imelda Seno ang chairman sa committee on women sa konseho maoy nangamahan niini ug co-sponsor si konsehal James Camara ug naaprubahan niadtong Pebrero 26.
Si Camara dihang nahinabi sa Banat News sa telepono mibutyag nga nakahukom silang ipa-imbestigar ang maong pasundayag nga gipasiugdahan ni Mayor Sonia Pua tungod kay ilang nakita nga grabe kaayo kabastos ang gipangsul-ob nga mugbo kaayong senina ug nakabikini pa ang mga babaye nga entrante niini.
Sumala pang Camara nga na-insulto ang kababayen-an niini sa ilang lungsod ug naghatag usab og dili maayong talan-awon ug pagtulun-an sa kabataan nga maoy daghang nanan-aw niadtong higayuna.
Hinuon dunay duha ka konsehal ang mi-abstain sa gihimong botasyon nga mao si Konsehal Baltazar Capuno nga nipadayag nga wala siya mosuporta niini tungod kay alang niya usa lang ka ordinaryong show ang maong pasundayag ug wala siya’y nakitang dautan niini.
Samtang si Konsehal Regel Bacula mipasabot sa iyang pab-abstain tungod kay wala siya makasaksi atol sa maong pasundayag.
Gawas niini ang mayoriya sa konseho ingon man ang presiding officer nga si Bise Mayor Martin Gerard Villamor miduso sa imbestigasyon aron kapanalipdan ang moralidad sa mga kababayen-an sa ilang lungsod ug aron dili na masubli ang maong law-ay’ng pasundayag.
Gisuwayan unta og kontak sa Banat News ang buhatan ni Mayor Pua kagahapon sa udto apan walay motubag sa opisina niini. – BANAT NEWS