Masahista seminaron sa Thailander

CEBU, Philippines - Ang trabahong masahista usa ka talentong talagsaon ug nagkinahanglan sa usa ka tawong may igong abilidad sa pagkat-on niini.

Apan dili tanang sistema sa pagmasahe sa lawas sa tawo epektibo alang sa pagpahiuli sa gikinahanglang kusog ug kabaskog sa lawas sa masahian, kundili nag-agad kini sa tukmang mga paagi nga masayran lamang gikan sa mga eksperto ug hilabihan ka batid bahin ning maong trabaho.

Mao kini ang hisgotanan atol sa unang WAT PO Thai Massage Conference nga ipahigayon diha sa Rajah Park Hotel sa dakbayan sa Sugbo karong Marso 8 ug 9 ning tuiga.

Gani gidapit sa NKYR Academy (INA) ang tanang masahista sa Kabisay-an ug Mindanao nga motambong niining maong komperensya tungod sa dugang kaalam nga ilang maangkon bahin sa pagka-masahista.

Si Tess Tatara ang executive officer sa INA nga kanhi nailhan nga Tonton TTM Training Center maoy mibutyag nga ang maong komperensya tambungan ni Mr. Preeda ang Presidente sa WAT PO kinsa gikan sa Thailand moanhi pagtuyo aron ihatag niya ang mga sekreto ug bendisyon sa tanang masahistang motambong niini.

Nasayran gikan kang Tess nga ang WAT PO maoy giila sa tibuok kalibotan nga maoy orihinal nga naandang masahe sa Thailand nga bisan walay lana, namatud-ang epektibo kaayo sa pag-ayo sa tanang matang sa sakit sa kaugatan sa lawas ug mga ngulngol sa lutahan.

Sumala usab ni Emmanuel “Tata” Hernani ang instructor sa INA sa Department of Health ug Presidente sa Association for the Advancement of Humanistic Psychology (AAHP) bahin sa ka-epektibo sa WAT PO kay daan na diay kining gipatuman sukad pa sa panahon ni Buddha kapin na sa 2,000 ka tuig nga milabay.

Busa sa tanang masahistang makatambong ning duha ka adlaw nga tigom gituohan nga dugang kasinatian ug kahibalo bahin sa pagka-masahista labi nilang mahuptan.   (Wen Celen)    (BANATNEWS)