Capitol may gahin para huwaw
CEBU, Philippines - Gitakdang mogahin og pundo ang kagamhanan sa probinsya sa Sugbo aron pagtubag sa kadaut sa mga pananom sa kalungsoran nga nangamatay tungod sa El Niño kon huwaw.
Si bokal Victor Maambong gitakdang mopasar og resolusyon nga magsitar og gahin nga kuhaon gikan sa calamity fund aron magamit nga ayuda niadtong mga lugar nga apektado na karon sa grabing kainit sa panahon.
Gani may report nga nadawat ang hunta probinsyal gikan sa mga mag-uuma sa lungsod sa Dalaguete kinsa nanghunong na karon sa ilang pagpananom kay dili na mosaler karon ang tanom gumikan sa kainit sa adlaw.
Sa pagkakaron giingong nanguling nalang ang maong mga mag-uuma aron may ikalahutay sila alang sa ilang inadlaw-adlaw nga konsumo.
Gisuta usab ni Maambong ang mga lugar nga naapiktahan sa grabeng huwaw aron masuta usab ang kantidad nga angayang igahin sa lalawigan.
Nunot niini gi-awhag sa board member ang mga Sugboanon nga magdaginot sa tubig nga imnonon ilabi na karong nanghubas na ang mga tinubdan sa kasapaan gumikan sa hilabihang kainit sa panahon.
Samtang ang committee on agriculture sa hunta probinsyal gitakda usab nga motuki niining epekto sa El Niño phenomenon aron mapangitaan og solusyon ang nasugatang kalamidad sa kalungsoran ug dakbayan dinhi sa Sugbo. (Darrel A. Carumba) (BANATNEWS)
- Latest
- Trending
