Fire prevention month gibuksan kagahapon sa BFP-7

CEBU, Philippines - Nanawagan sa publiko ang kabomberuhan nga magmatngon aron malikayan ang sunog nunot niining nasinating huwaw kon El Niño phenomenon.

Mao kini sentro sa mensahe ni Cebu City Fire marshall Supt. Esmael Codilla atol sa pagbukas sa fire prevention month kagahapong adlawa.

Gipahibawo ni Codilla nga miabot na og 24 ka mga sunog ang mitumaw dinhi sa dakbayan gikan sa petsa uno sa bulan sa Enero hangtud sa pagtapos sa Pebrero nga gibana-banang moabot og P14.8 milyones ang kinatibuk-ang danyos.

Ang katapusang miigo nga sunog dinhi sa dakbayan sa Sugbu nga maoy labing daghan og pamilyang naapektahan mao ang sunog diha sa barangay Tisa ning siyudad nga diin dili mominos 100 ka panimalay ang hingpit naugdaw.

Hinuon walay gikatahong dunay namatay o naangol sukwahi sa gisundan sa maong sunog diha sa P. Rodriguez Street sa barangay Capitol Site diin upat gyud ka kinabuhi ang nakalas.

Usa ka caravan ug fun run ang gipasiugdahan sa mga sakop sa Fire Prevention kagahapong adlawa atol sa pagbukas sa kasaulogan sa fire prevention month nga may temang “Sustaining Fire Prevention Through Active Community Participation.”

Ang kabomberuhan mipasabot nga ang labing epektibong pamaagi batok sa sunog mao ang pagpakabana mismo sa mga tawo sama sa pag-amping sa paggamit sa kalayo, kuryente ug ang saktong paggamit sa suplay sa tubig.

Ang kabomberohan nagkanayon nga kinahanglan ang mga appliances ug uban pang mogamit og kuryente, kalayo, flammable materials ug uban pang delikadong butang kinahanglang bantay ilabi niadtong mahimong makab-ot sa mga bata.

Gawas niini mipasidaan usab ang kabomberuhan nga dili gyud biyaan ang pinuy-anan nga walay tawo kanunay aron dunay makabantay sa mga butang nga posibleng nataligam-an ug maoy makamugna og sunog.

Si Provincial Fire Marshal Chief Insp. Victor Vibares nagkanayon nga human sa usa ka Santos nga Misa sa St. Florion chapel sulod sa buhatan sa BFP-7 gibendisyunan dayon ang duha ka bag-ong fire trucks gikan sa Minglanilla ug San Fernando Fire stations ingon man ang rubber boat sa Lapu-lapu City Fire Department.

Ang tanang fire-stations ug sub-stations sa tibuok rehiyon dungan nga mipatingog sa ilang siren timaan sa pagsugod sa usa ka buwang selebrasyon sa Fire Prevention Month.

Mitambong usab sa maong motorcade ang mga volunteer organization sama sa Barangay Fire Brigade, BFP Firetruck, ug mga non-government organizations o NGO’s volunteers ug firefighters. (BANATNEWS)