CEBU, Philippines - Gikalipay og dako ni Mayor Tomas Osmeña ang kabaga sa duot sa mga tawong mitambong sa grand campaign rally sa Liberal Party niadtong milabay'ng Sabado nga gitambungan sa mga urban poor, senior citizens, kabatan-onan ug uban pang sector.
Si Osmeña kinsa kandidato karon isip kongresista sa habagatang distrito nagkanayon nga ang gidaghanon sa tawo nagpakita sa kapasidad sa Bando-Osmeña Pundok Kauswagan (BOPK) sa pag-mobilize sa mga tawo.
“This is our way of testing the capabilities of our organization in mobilizing. The crowd here is not even one fourth (25 percent) of what the previous rally has gathered”, ni Osmeña nga ang buot niyang ipasabot mao ang gipahigayong rally sa Nacionalista Party sa Mandaue City Reclamation Area sa milabay'ng semana. Sayo pa niini, si Osmeña nagkanayon nga ang LP wala'y budget alang sa usa ka grand campaign labi na sa gitawag niyang “hakots.” Wala usab sila mogasto og salapi sa maong grand rally tungod kay ang misagubang sa galastohan mao man ang mga supporters sa BOPK kinsa maoy mi-organize sa rally sa LP.
Si Cebu City Administrator Francisco Fernandez nagkanayon nga dunay mga grupo kinsa nagdala og sakyanan nga nagpasakay og mga tawo apan ilaha na kining pagbuot.
“If we resort to hakot, the number of people we can manipulate. We can buy their presence but not their enthusiasm. And the enthusiasm is what we want to see from them and what we just saw,” ni Fernandez pa.
Ang maong grand rally niadtong Sabado gitambongan ni standard bearer Senator Benigno “Noynoy” Aquino III ug sa iyang runningmate nga si Senador Manuel Roxas uban nila ni Senatorial candidates Franklin Drilon, Ruffy Biazon, Nereus “Neric” Acosta, Risa Hontiveros-Baraquel, Ralph Recto, representative Sonia Roco, Danny Lim ug Alex Lacson. - Brenda Batuto gikan ni Jessica Ann Pareja sa The Freeman (BANAT NEWS)