CEBU, Philippines - Ang mga sakop sa Minglanilla Traffic Commission (MITCOM) ug uban pang kapolisan sa maong lungsod gitakdang seminaron sa Land Transportation Office (LTO) aron makapanakop sila og mga drayber nga malapason sa balaod sa trapiko ug sa samang higayon makaluwat sila og Temporary Operator’s Permit (TOP) sa mga madakpan.
Ang bag-ong hepe sa nahisgutang lungsod nga si Chief Inspector Jovito Canlapan nga nahinabi sa Banat News kagahapon mibutyag nga sa iyang pag-courtesy call ngadto sa konseho sa lungsod sa miaging semana usa sa mga nahisgutan mao ang bahin sa paghuot kanunay sa mga sakyanan sa ilang kadalanan ilabi na sa highway.
Apan gumikan kay walay seminar ug wala usay TOP, ang mga sakop sa MITCOM ug ubang kapolisang mobantay sa trapiko, dili makapanakop sa mga badlongong drayber.
Sa pagkakaron gipangandaman na usab sa kapolisan sa Minglanilla ang kasaulogan sa Kabanhawan Festival karong Abril niining tuiga diin ang pagdasok sa katawhan ug mga sakyanan maoy makabara sa dagan sa trapiko ug usa na usab sa sulirang atubangon sa kapolisan.
Si Canlapan kinsa maoy mihulip kang Inspector Leoncio Baliguat Jr. ang kanhi hepe sa kapolisan sa maong lungsod nagkanayon nga gawas sa suliran sa trapiko ang laing problema nga gisuta niya karon mao ang bahin sa ginadiling drugas ug sugal sama sa hantak ug uban pa diha sa maong lungsod. (Brenda D. Batuto) (BANATNEWS)