Dakong suliran sa Barili gilantaw

CEBU, Philippines - Usa sa dakong suliran nga naghulga sa lungsod sa Barili nga gusto sa usa ka Barilinhon nga kahatagan og hinanaling kasulbaran sa dili pa ulahi ang tanan mao ang pag-atiman dayon sa sapa sa Santa Ana nga gikabra ug nakankanan na pag-ayo sa tubig.

Si Rene Alquizola , usa sa mga kandidato sa pagka-konsehal sa lungsod gibati og kahingawa sa kahimtang sa maong sapa gumikan sa kapeligro niini nga mahulpa ug maapektahan ang dike sa lungsod.

Si Alquizola kansang katiguwangan ug pamilya daan nang naggamot diha sa lungsod nagkanayon nga kun maguba ang dike sa Poblacion, hayan nga molutaw ang tibuok Poblacion sa Barili.

Busa alang kaniya inigliwas sa piniliay makigdugtong siya sa buhatan sa enhiniriya sa lungsod aron nga kapangitaan og paagi nga ikapaayo dayon ang maong sapa.

Si Alquizola kinsa mikandidato ubos sa One Cebu Party nagkanayon nga nalipay kaayo siya karong misaad na si Kongresista Pablo John Garcia nga mogahin og salapi aron kariprapan ang tampi sa maong sapa.

Kini tungod kay nalantawan usab sa kongresista nga kun moabot ang tinguwan unya tingbaha na usab may dakong kalagmitan nga mahurot ang daplin sa sapa nga sa pagkakaron dako na kaayo ang pagkapahak sa yuta.

Sa bahin ni Alquizola, siya nagkanayon nga bisan dili siya enhinero apan nasuta niya nga nagkinahanglan gyud og lig-on nga pundasyon ang daplin sa maong sapa aron nga dili kini makahulga sa dakong lunop unya sa lungsod.

Matud pa niya nga mas maayong sa sayo pa masulbad na ang maong problema samtang dili pa ulahi ang tanan.   (Wen Celen)   (BANATNEWS)