CEBU, Philippines - Upat ka tawo ang nasikop gumikan sa ilegal nga drugas samtang mikabat sa napulo ka mga makina sa sugal ang nasakmit sa kapolisan atol sa gilusad nilang saturation drive sa nagkalainlaing lugar ning dakbayan sa miaging gabii.
Ang nadakpan mao sila si Mark Alegrado, 22, nga taga Poblacion, dakbayan sa Carcar, Spencer Takimura, 20, taga sitio San Miguel, barangay Lorega, dakbayan sa Sugbo,Lerma Lasnar, 45, taga barangay Poblacion, dakbayan sa Talisay ug Rowena Dadula Cuizon nga taga sitio Baho, barangay Labangon, dakbayan sa Sugbo.
Nasayran gikan sa kapolisan nga ang mga dinakpan nasakpan gyud sa akto samtang naghupot kini og ginadiling drugas.
Nakuha gikan sa mga dinakpan ang Nalbuphine Hydrochloride ug disposable syringe.
Nasakmit usab sa kapolisan ang mga video karera machine, ug molimoli didto sa barangay Labangon .
Sa pagkakaron gitanggong na ang mga dinakpan samtang gitakda nga ipasaka na ngadto sa hukmanan ang tukmang kaso niini. (Lesley Caminade) (BANATNEWS)