CEBU, Philippines - Duha ka babayeng call center agent gi-holdup sa duha ka mga batan-ong tulisan atol sa ilang break time diha sa Blue Blade Compound sa P. Remedios St. Brgy. Banilad dakbayan sa Mandaue kagahapon sa kadlawon.
Ang biktima mao sila si Eden Grace Marsado, 22, lumad sa Buhangin, Davao City ug kasamtangang nagpuyo sa Purok 4 barangay Camputhaw dakbayan sa Sugbu ug Zyrah Myrrh Cabalida, pulos mga call center agent sa maong dapit.
Matud pa ni PO3 Rey Manatad sa Station 4 sa MCPO base sa pamahayag ni Marsado mga alas 3:35 nag-break sila ug migawas aron unta mangaon.
Apan samtang nagpaabot og kasakyang taksi duha ka mga batan-ong luwan og motorsiklo ang miduol kanila dayong tion sa usa ka nikiladong armas hinungdan nga si Cabalida sa iyang kahadlok mikaratel og dagan.
Si Marsado nga maoy nabilin ug gumikan sa iyang kahadlok wala na makapalag dihang gikuha ang iyang pitaka nga adunay P3,500 lakip na ang ID sa ilang gitrabahoan.
Human sa maong pagpanulis daling mipadagan palayo sa maong dapit ang mga tulisan samtang nagsige og tion ngadto kaniya hinungdan nga wala kini makapangayo og tabang.
Mipahimangno karon ang kapolisan ngadto sa publiko kun dunay masigpatang tawong kadudahan sa ilang palibot ilabi na duol sa ilang trabahoan pagpahibalo dayon sa awtoridad. (Bong Soriano ug Romeo Limpangog) (BANATNEWS)