Welder sa pawnshop gipusil angol

CEBU, Philippines - Anaa pa sa tambalanan ang usa ka welder sa M.Lhuillier Company human kini pusila samtang diha sa iyang trabaho sulod sa buhatan sa maong kompaniya didto sa barangay Corte, lungsod sa Carmen niadtong Biyernes sa gabii.

Ang biktima mao si Rommel Patajo Borbon, 35, minyo nga taga Corte ug nagtrabaho isip welder sa M. Lhuillier sa maong lungsod.

Si PO2 Romano Morales sa Carmen Police Station mibutyag sa Banat News nga buot na unta nga mouli sa balay ang biktima niadtong tungora.

Apan samtang diha pa siya sa compound sa kompaniya ug mao pay pag-undang sa trabaho, kalit lang milanog ang tulo ka buto sa armas de fuego.

Dayon gibati og paminhod ang iyang paa hangtod nga naglisod na siya sa paglakaw hinungdan nga gihatod dayon siya ngadto sa tambalanan sa dakbayan sa Sugbo.

Sa pagkakaron wala pa hiilhi sa kapolisan ang mipusil sa biktima.   (Darrel A. Carumba)   (BANATNEWS)