Mayor Soc nag-una sa survey

CEBU, Philippines - Si incumbent Mayor Socrates Fernandez sa dakbayan sa Talisay maoy nanguna sa gihimong pribadong survey alang sa mga mikandidato sa lokal nga posisyon human makakuha og 70 porsiyentong puntos kompara kang kanhi Bokal Raul Bacaltos kinsa nakakuha lang og 17 porsiyento nga puntos.

Ang maong survey gipasiugdahan sa amahan sa usa sa mga midagan pagka-konsehal sa siyudad nga si Ricky Aznar kansang anak mikandidato pagkakonsehal nga si Choy Aznar, matud ni Konsehal Dennis Basillote.

Si Basillote nga nahinabi sa Banat News mibutyag nga si Ricky Aznar mipahigayon og kinaugalingong survey niadtong buwan sa Enero niining tuiga.

Matud ni Basillote nga migawas nga si Fernandez gihapoy mas gipili sa mga respondents samtang sila si Bise Mayor Alan Bucao sa administrasyon ubos sa Nacionalista Party ug si kanhi Bise Mayor Aberdovey Belleza kinsa ubos sa Liberal Party nagtigi sa pwesto.

Si Bucao ang nakakuha og 45 porsiyentong puntos samtang si Belleza ang nakakuha og 40 porsiyentong puntos.

Sa mga konsehal, si Basillote nakakuha og 60 porsiyentong puntos ug gisundan ni Konsehal Rodi Cabigas kinsa nakakuha og 59 porsiyentong puntos ang duha ka nahisgutang konsehal ang parehong ubos sa landong sa administrasyon.

Nagsunod si Konsehal Bernard Joseph Odilao sa administrasyon gihapon, si Eduardo Gullas III kinsa apo ni Kongresista Eduardo Gullas ang nahimutang sa ika-upat nga pwesto, ikalima si Choy Aznar, sunod si Konsehal Edward Alesna, Ronnie Capala, ang kanhi Konsehal nga si Inaki Jordana kinsa midagan isip independenete, Danny Caballero sa LP kinsa bag-ong sulbong sa politika ug ang kapitan sa barangay Lagtang nga si Celiapo Cabuenas. (Brenda Batuto)    (BANATNEWS)