Kanhi barangay kagawad gipunggotan

CEBU, Philippines - Kanhi kagawad sa usa ka barangay sa lungsod sa Balamban gipaulanan og bala una pa giputlan og ulo ang nakaplagan daplin sa sapa sa Cabatbatan barangay Bayon sa miaging hapon.

Si Hemicilio “Hemi” Taburnal Sirondo,51, kanhi kagawad sa barangay Matun-og ug kasamtangang nagpuyo sa nahisgutang lugar nakaangkon og daghang samad pinusilan sa kalawasan ug giputlan sa iyang ulo dayon gilabay kini pipila ka metros gikan sa patay’ng lawas.

Sumala pa sa kapolisan gibana-banang lima ka tawo ang mga mipasipala sa biktima apan padayon pang gipangita sa pagkakaron.

Sa pakighinabi sa Banat News kang PO2 Hannibal Larida nga nakadawat og tawag sa telepono ang kaubang si SPO2 Jude Agwanta gikan sa usa ka tawong nagpahibalong may usa ka patay’ng lawas sa sapa nga ilang nakaplagan.

Naabtan nila sa maong dapit ang patay’ng lawas sa biktima anaa na sa kilid sa sapa nga walay ulo ug dihang ilang gisiksik ang palibot niini napalgan ang nawagtang nga ulo pito ka metros gikan sa lawas niini.

Nasayran nga ang kaliwat sa biktima nga nagpuyo dili layo sa nahitaboan mibutyag sa mga polis nga nakadungog sila og sunod nga buto sa armas.

Apan gumikan kay gabii naman ug ngitngit ang lugar wala nila kini panumbalinga, nahibulong nalang sila nga nagkalawom na ang kagabhion wala pa gihapon makabalik ang biktima gikan sa umahan sa sitio Cabatbatan hinungdan nga ilahang giapas.

Dangtan pila ka oras nga pagpangita ug nagkalawom na ang gabii namauli nalang sila ug nianang pagkabuntag ilahang gi-report sa Balamban Police Station nga na-missing kini.

Dihang nasayran nilang may usa ka patay’ng lawas nga nakaplagan sa sitio Cabatbatan ilaha dayon kining gisusi ug mao nalay ilang nasutang si Sirondo kini.

Nakuha usab sa mga polis ang duha ka magnum sa kalibre .30, usa ka naguba nga barrel nga may bala sa .357; usa ka sanggot; pito ka kabhang sa kalibre .30 caliber; usa ka kabhang sa kalibre .45; unom ka kabhang sa kalibre .9mm; duha ka buhing bala sa kalibre .9mm ug usa ka deformed slug sa kalibre .9mm.

Matud pa ni Larida nga posibleng adunay dakong kaligutgot ang mga mamumuno ngadto sa biktima tungod sa ka brutal nga paagi sa pagpatay.

Nagduda usab ang kapolisan sa Balamban nga posibleng ang mga Marijuana planters maoy mihimo niini sa biktima tungod kay aktibo kini kaayong mosumbong ug mohatag og impormasyon sa mga plantasyon sa marijuana sa maong dapit samtang wala isalikway ang ubang posibleng personal nga motibo sa mga mamumuno.   (BANATNEWS)