Gipunaya'g basul sa ginikanan naghikog

CEBU, Philippines - Nagpakamatay ang usa ka 18 anyos nga ulitawo gumikan sa   kaguol kay giligid kini og basul sa iyang ginikanan sa pagkadakop sa ilang motorsiklo didto sa sitio Ilag, barangay Cantabacco, siyudad sa Toledo niadtong Huwebes sa hapon.

Ang naghikog mao si Wendy Tamayo Revera, 18, ulitawo, nga taga Ilag.

Si PO2 Roel Sukuib sa Toledo City Police mibutyag sa Banat News nga ang igsoon ni Wendy kinsa wala makuhai og ngalan maoy nakadiskobre sa nagbitay nga wala nay kinabuhi niyang igsoon sa sulod sa ilang balay.

Matud pa hose sa tubig ang gibubod sa liog niini kansang pikas tumoy didto igaid sa sagbayan sa ilang balay.

Gisuwayan pa kini paghatod ngadto sa usa ka klinika sa barangay Lutopan apan gideklarar kining dead on arrival.

Sa pasiunang imbistigasyon ni SPO3 Jose Dante Talandron sa Toledo City Police Station nasuta nga gibati sa tumang kaguol ang maong ulitawo kay gipunayan kini og basul sa iyang ginikanan human iimpound sa kapolisan ang ilang motorsiklo kay gisakyan niya nga walay lisensya atol sa usa ka check point. – BANAT NEWS