Central Visayas way tipdas

CEBU, Philippines - Bisan paman mitumaw ang sakit nga tipdas ug daghan na sa mga kabatan-onan ang nataptan niini ilabina didto sa Metro Manila, ang Department of Health (DOH)-7 mibutyag nga wala pa silay nadawat nga report nga duna nay kaso sa sakit nga tipdas sa mga kabataan dinhi sa dakbayan ug lalawigan ug ubang bahin dinhi sa Central Visayas.Si Dr. Naida Bautista ang medical coordinator sa DOH-7 nagkanayon nga posibleng dili gyud makakuyanap ang tipdas dinhi sa Sugbu ug ubang lugar dinhi sa rehiyon siyete gumikan kay 90 porsiyentong nagmalampuson ang gihimong pamakuna sa DOH-7 ngadto sa mga kabataan sa milabay'ng tuig.

Matag semana ang Department of Health inabagan sa mga medical workers sa matag lokal nga kagamhanan nagpadayon sa ilang gipahigayong pamakuna batok sa tipdas sa mga kabataan.Sa nasayran miabot na og kapin sa usa ka gatos ka mga bata ang nataptan og sakit nga tipdas sa ubang bahin sa Luzon ug gani duna nay nangamatay sa maong sakit.

Mitambag si Bautista ngadto sa mga inahan nga kinahanglang moadto sa ilang tagsa-tagsa ka health centers aron mabakunahan og libre alang sa tipdas ang ilang mga anak aron malikayan nga mataptan niini.Gipasalig ni Bautista nga aduna sila'y paigong supply sa pamakuna sa mga bata alang sa panagang sa sakit nga tipdas nga bugtong mao ray panagang ug wala nay lain pa aron malikay ang bata niini. – BANAT NEWS