CEBU, Philippines - Si kanhi 6th district Provincial Board member Luigi Quisumbing mitumbok nga iyang gisuportahan ang ambisyosong tinguha ni Bohol Governor Erico Aumentado nga magtukod og taytayan nga magdugtong sa lalawigan sa Bohol ug sa lungsod sa Cordova.
Si Quisumbing nga giinterview sa DyRF miingon nga nindot kaayo ang maong plano sa gobernador sa Bohol sanglit makatabang og dako ang maong proyekto sa pagpalambo sa ekonomiya sa sixto distrito ug sa mga lalawigan sa Sugbo ug Bohol.
Si Aumentado sa sayo pa mibutyag sa DyRF nga nakakita na siya og kaabag nga taga Korea aron matukod ang taytayan tali sa Bohol ug sa Cordova.
Sumala sa gobernador sa Bohol nga ang kagamhanan sa Korea andam nga mogarantiya og kuwarta alang sa kagamhanan sa lalawigan sa Bohol aron madayon ang pagtukod sa maong taytayan.
Hinuon himoon pa ang dugang sabotsabot tali sa kagamhanan sa Bohol ug sa Korea una ipatuman sa hingpit kining maong laraw.
Nagtuo si Quisumbing nga sa higayon nga masugdan na ang naasoy'ng proyekto dili usab imposibleng matuman ang plano ni Lakas-Kampi-CMD standard bearer Gilberto Toedoro nga tukoran usab og taytayan ang Corvoda ug South Road Properties(SRP) sa siyudad sa Sugbo.
Dugang pa ni Quisumbing nga kun mapili siya nga kongresista sa sixto distrito, usa sa iyang prayoridad nga proyekto mao ang pagporsige nga matukod ang taytayan sa Bohol ug Cordova ingon man ang sa Cordova ug SRP sa dakbayan sa Sugbo. – BANAT NEWS