Mabdos gipatay sa kapuyo

CEBU, Philippines - Patay nang nakaplagan ang usa ka mabdos nga babaye sa sitio Looc, barangay Tayud sa lungsod sa Consolacion sayo sa buntag kagahapon ug ang suspek nga lalaki nga gikapuyo niini napalgan usab sa sikbit nga sitio nga nagbuy-od ug patay na apan gituohang naghikog pinaagi sa pagpusil sa iyang kaugalingon.

Ang gipatay mao si Shella de Vera, 29, nagpuyo sa sitio Calero sa barangay Tayud, lungsod sa Liloan ug factory worker sa Mitsumi Industry sa dakbayan sa Danao kinsa nakaangkon og usa ka samad pinusilan sa likod.

Dunay dili pa kumpirmadong report nga giingong mabdos og tulo ka bulan si de Vera.

Ang suspetsado nga kapuyo ni de Vera nga si Fidel Pepito, napalgang patay na ug nagbuy-od sa kasagbutan sa gwardiyang si Rey Calungsod diha sa Callero Memorial Park sa Liloan.

Gituohang nag-unay kini pagpusil sa iyang kaugalingon ginamit ang usa ka kalibre .45 pistola nga may tulo ka buhing bala nga na-recover gihapon diha sa tupad sa iyang patay'ng lawas sulod sa sam-ang.

Si PO1 Julius Patac sa Consolacion Police Station nga nahinabi sa Banat News miingon nga nakadawat sila og tawag gikan sa usa ka concerned citizen nga nagpahibalo labot sa patay’ng lawas sa babaye nga napalgang patay sa nahisgutang lugar alas-6 pasado ang takna sa buntag kagahapon nga nasutang si de Vera. Matud pa ni PO1 Patac nga pangabubho maoy ilang gituohang nag-unang hinungdan sa panag-away sa managkapuyo nga miresulta sa duguong panghitabo.

Sa paglabay sa pipila ka gutlo sa ilang pagtubag sa maong alarma uban sa mga sakop sa Scene on Crime Operation ilang nadawat ang taho nga may patay’ng lawas sa usa ka lalaki ang gikatahong napalgan usab sa sam-ang sitio Calero sa barangay Tayud sa lungsod sa Liloan ug utlanang bahin sa sitio sa Looc sa barangay Tayud sa lungsod Consolacion.

Si PO1 Ryan Heyrosa sa Consolacion Police Station miingon nagpadayon pa ang ilang imbestigasyon alang sa pagsuta sa hinungdan sa panag-away sa managkapuyo nga miresulta sa dugoong panghitabo.

Apan si Annabelle Cabahug, igsuon ni Pepito sa pakighinabi sa Banat News mibutyag nga dugay nang nagpuyo ang iyang igsuon (Epe) ug si de Vera ug duna nay usa ka anak. Apan mipuyo na kini kaniya gumikan sa sakit niining gihambin sa “gal bladder” kon apdo ug medyo nawad-an na sa ensaktong panghunahuna gumikan sa iyang sakit nga nawad-an na ug paglaom nga mamaayo pa kini. Kagahapon mga alas 3:00 sa kaadlawon iyang gikuha sa trabahoan sa Mitsumi si de Vera aron dad-on kini pauli, apan nahibulong silang wala na kini makauli ug pipila ka oras ang milabay gipahibawo nalang silang napalgan nalang kini nga patay na sa lungsod sa Consolacion sa usa ka hilit nga dapit. Si SPO2 Remegio Elacion sa kapolisan sa Liloan nga nahinabi sa Banat News miingon nga nagtuo silang nag-away ang duha nga miresulta sa duguong panghitabo.

Matud pa niya nga unang gipusil ni Pepito ang kapuyo niini sa dapit diin napalgan ang patay’ng lawas ug pagkahuman miadto kini sa unahan paingon sa sitio Calero ug diha na magpakamatay.

Sa ubos nga bahin sa nahimutang sa patay’ng lawas ni Pepito ilang napalgan ang motorsiklong giingong gipalit ni de Vera. Sumala pang Elacion ilang ipailawom og paraffin test ang patay'ng lawas ni Pepito pagsuta kun nakapabuto ba gyud kini og armas. – BANAT NEWS