'City Hall di ka-afford P10 mil kada estudyante'

CEBU, Philippines - Si provincial treasurer Roy Salubre nagkanayon nga naglisod siya pagtuo nga maka-afford ang kagamhanan sa siyudad sa Sugbo sa paghatag og labing minus P10 mil ngadto sa tanang mogradwar sa high school sa mga pampublikong tunghaan sa siyudad aron makapadayon sa pagtungha sa mga state colleges ug universities.

Nagtuo si Salubre nga dili paigo ang pundo sa siyudad sa Sugbo kun gastohan ang tanang mga high school graduates sa pag-eskwela sa kolehiyo kay daghan man ang mga mo-graduate sa high school karong tuiga.

Hinuon gitino ni Salubre nga ang katumanan sa lakang ni Mayor Tomas Osmeña mag-agad lamang sa gidak-on sa koleksiyon sa revenue sa siyudad matag tuig ug uban pang gastohan sama sa mga basic services lakip na ang matag tuig nga utang.

Si Salubre miingon nga bisan og mokapin na sa bilyon ang surplus sa Kapitolyo, apan si Gob. Gwendolyn Garcia mihatag lamang og scholarship ngadto sa top five sa matag eskwelahan ug sa mga pobre apan deserving nga mga graduate sa high school nga maka-eskwela sa kolehiyo sa pampublikong tunghaan.

Sumala pa niini nga dili P10 mil ang ihatag sa probinsiya ngadto sa mga scholars niini kun dili libreng tuition fee ug usa ka libong allowance matag bulan.

Si Salubre nagkanayon nga gituyo kini sa gobernadora aron dili kahutdan og pundo ang Kapitolyo ug may magasto pa kini alang sa ubang mga panginahanglanon sa kagamhanan sa lalawigan.

Gawas sa scholars, ang Kapitolyo mitukod usab og dili mominus 200 ka mga school buildings nga gilangkoban sa kapin sa 400 ka classrooms ngadto sa halos tanang mga eskwelahan sa kalungsuran.

Apan sa iyang bahin, si Osmeña miingon nga seryoso siya sa paghatag og gahin matag tuig alang sa mga high school graduate aron mopadayon pagtungha sa kolehiyo.

 Matud pa ni Osmeña nga nahinabi sa DyRF nga iyang gipanaad nga mahatag iyang gisaad sanglit dako kaayo ang panginahanglanong professionals ilabi na sa kursong computer engineering alang sa mga langyaw nga kompaniya nga mobubo og puhunan sa South Road Properties (SRP).

Ang mayor nagkanayon nga gisayangan siya sa oportunidad sa mga Sugbuanon kay daghan untang mga American companies ang magsugod na og operate apan wala sila makakita sa ilang gikinahanglang mga propesyonal.

Samtang si kanhi mayor Alvin Garcia wala mipakita og pagsupak sa lakang ni Osmeña bisan og iyang kontra sa politika.

Apan gitataw ni Garcia nga angayan unahon unsay prayoridad sa siyudad sama sa pagsumpo sa nagkadaghang namatay sa dengue ug pagpalambo sa Cebu City Medical Centers. – BANAT NEWS