CEBU, Philippines - Andam mohatag og P100 mil nga ganti si Mayor Tomas Osmeña alang sa makahatag og impormasyon ug makasikop sa tulisan mipusil sa usa ka tanod nga nag-inusarang miresponde sa tulis sa miaging buntag sa sitio Bayanihan sa barangay Basak.
Si Osmeña nagkanayon nga iyang hatagan ang bisan kinsang makatultol ug makasikop sa suspetsadong si Christopher “Abay-abay” Albo nga molupyo ra usab sa barangay Basak nga nagpusil ni Danito Sobrian Cabaluna ang barangay tanod sa nahisgutang barangay.
Si Cabaluna anaa pa karun sa makuyaw nga kahimtang sumala pa ni Kapitan Dave Tumulak kagahapon.
Matud pa ni Osmeña nga kun magkinahanglan pa og dugang mga tanod sa tibuok barangay sa syudad sa Sugbo wala kini problema kini aron usab madugangan ang pwersa sa mga tanod. Gani mipasabot usab si Osmeña nga walay hunong ang iyang paghatag og assistance ngadto sa mga barangay tanod susama sa mga radio, sakyanan, ug 2 mil nga increase sa ilang sweldo kini aron usab maaghat ang mga tanod sa paghimo sa ilang responsibilidad.
“I don’t know whether these things are happening because of lack of training,” pangutana pa ni Osmeña.
Samtang nabuhi na usab ang panawagang angayang armasan ang mga tanod gumikan kay mao na kini ang ikatulong higayon nga napusilan ang mga mirespondeng tanod sa mga insidente sa tulis.
Si Osmeña miingon nga angayan nang armasan ang mga tanod aron makasukol sa mga armadong tawo. Gani iyang gikumparar ang mga tanod ngadto sa mga gwardiya nga adunay armas nga wala gani kini moagi og proficiency test kumpara sa mga tanod nga nakapasar sa maong test.
Apan miangkon kining dili nalang siya maglaom niini tungod kay imposibleng maarmasan ang mga tanod tungod kay pagtan-aw sa uban ang mga tanod mga palahubog ug uban pang mga negatibong estorya bahin kanila.
Sukwahi sa mga negatibong reaksyon kabahin sa mga tanod iyang ikahulagway nga ang syudad sa Sugbo adunay kasaligan ug maayong mga tanod. – BANAT NEWS