Gipetisyonang polis mhimakak sa pasangil

CEBU, Philippines - Ang polis nga gipetisyonan sa dul-an sa 100 ka mga residente sa barangay Pardo ning siyudad sa Sugbu nga si SPO4 Sanrico Jolejole kusganong mihimakak sa tanang mga alegasyon nga gibato kaniya.

Matud pa ni Jolejole nga walay kamatuoran ang gipasangil sa nangulo sa pagduso sa maong petisyon nga mao si Madronio Sabellano ang amahan sa giingong biktima sa iyang pagpamusil nga si Reynaldo Sabellano sa Pardo niadtong Enero 11, 2009.

Sumala pa ni Jolejole sa pakighinabi sa Banat News nga ang mga alegasyong gipasangil ni Sabellano batok kaniya walay basehanan ug katuyuan lang niini mao ang pagdaot sa iyang pagkapolis.

 Matud pa ni Jolejole nga dili tinuod nga ang tanang kaso sa korte sa anak ni Sabellano nga si Reynaldo na-dismiss kay nakombikto na kini sa kasong kalapasan sa City Ordinance 2108 kon anti-dispatching ordinance sa Municipal Trial Court in Cities Branch 7 niadtong Disyembre 2, 2009 human miangkon sa sala niini niadtong Nobiyembre 25, 2009.

 Apan sa dokumentong gipakita ni Jolejole sa Banat News, si MTCC Branch 7 Judge Francisco Seville Jr. nagkanayon: “Considering that the accused has already paid the administrative fine in the amount of Five Hundred Pesos (P500.00)...this case is hereby ordered DISMISSED.”

 Gipanghimakak usab ni Jolejole nga ang laing anak ni Sabellano nga si Bernabie Sabellano namatay sa sulod sa bilanggoan samtang napriso pa sa kasong paghupot og illegal nga drugas nga giingong na-dismiss tungod kay wala niya tungaha ang mga bista sa korte.

 Sumala pa ni Jolejole nga si Bernabie Sabellano nakombikto sa kasong paglapas sa Section 15 Article II of RA 9165 niadtong Pebrero 6, 2004 tungod sa pagpayuhot og marijuana ug namatay sa sakit dihang nakagawas na sa bilanggoan, sukwahi sa pangangkon sa pamilyang namatay kini nga wala pa makagawas sa bilanggoan tungod sa gibutang-butang nga kaso.

 Giangkon si Jolejole nga nalangay ang pagbista sa kaso hinungdan nga napriso si Bernabie Sabellano sa duha ka tuig apan ang silot nga gipahamtang ni RTC-7 Branch 15 Judge Fortunato de Gracia Jr. mao lamang ang pagkapriso sulod sa unom ka bulan.

Giklaro usab sa maong polis nga ang kasong pagpangawat nga gipasaka batok kang Reynaldo Sabellano uban ang usa ka minor de edad, dili siya maoy nakadakop kondili usa ka sibilyan nga si Leopoldo Lobitania ug gi-turnover sa imbestigador nga si SPO3 Manuel Cañete ug dili siya.

Gihimakak usab niini nga iyang gi-harass ang testigo nga si Cenon Tabura tungod kay igo lang siyang mihatud sa warrant of arrest batok niini human makanselar ang probationary application bahin sa kalapasan niini sa city ordinance.

Apan sa interbyu sa Banat News, ang inahan ni Cenon Tabura nga si Laurena Tabura mipasangil nga ‘planted’ ang ebidensiya, gipaangkon kini sa Public Attorneys Office aron maka-apply og probation uban sa pag-sponsor ni Kagawad William Tajanglanit aron makabalik dayon kini sa pag-eskuyla.

 Apan matud pa ni Laurena Tabura nga misibog ang konsehal sa iyang pag-sponsor sa dinakpan hinungdan nga napriso gyud hinuon ang iyang anak sa city jail sa barangay Kalunasan kaniadto. - Chester Abadilla (BANAT NEWS)