Corro wa kalingkod

CEBU, Philippines - Pakyas gihapon si Engr. Augosto Corro paglingkod isip mayor sa Daanbantayan kagahapong adlawa bisan pa og nakapanumpa na sa iyang katungdanan atubangan ni RTC-7 Branch 9 Judge Geraldine Faith Econg.

Kini tungod kay ang Department of Interior and Local Government (DILG) wala mo-recognize sa writ of execution nga giisyu sa korte sa dakbayan sa Bogo.

Sumala pa ni DILG-7 regional director Pedro Noval nga dili siya makasilbi sa writ of execution nga giisyu ni RTC Branch 61 Judge Antonio Marigomen sanglit wala pa man mabakante ang posisyon sa pagka-mayor ug pagka-bise mayor sa lungsod sa Daanbantayan ug dili pa usab final and executory ang desisyon nga gipakanaog sa Comelec-Manila ilabi na nga nakadawat na usab siya og kopya sa motion for reconsideration ni Mayor Sun Shimura ug ni Bise Mayor Maria Luisa Loot nga nagkuwestiyon sa desisyon sa Comelec.

Sumala pa ni Noval nga niadto siya sa sala ni Marigomen kagahapon sa buntag dala ang sulat nga nangayo og guidance kun unsay iyang buhaton apan iya na lamang kining gibilin ngadto sa clerk of court nga si Rey Caayon.

Sa pagkahapon, miabot ang tubag gikan sa huwes nga nagpahibalo nga i-hold una ang pagpatuman sa writ of execution sa paglingkod ni Corro ug sa iyang bise mayor nga si Dr. Jose De Leon.

Sumala pa ni Noval nga ang giila nilang mayor sa Daanbantayan mao gihapon si Shimura ug ang bise mayor mao si Loot.

Si Corro sa iyang bahin nagkanayon nga moisyu unya siya og kamanduan sa tanang mga department heads sa munisipyo siya na ang ilhong mayor ug motuman sa iyang mando ug dili kang Shimura sanglit mahimo ra kining null and void kay alang kaniya siya ang tinuoray nga mayor.

Apan si Loot igo lang mikatawa sa pamahayag ni Corro ug miingon nga dili sila mokanaug sa munisipyo hangtod nga ang Comelec momando sa pagpahawa kanila sa puwesto.

Matud pa ni Loot nga dili magsilbi ang pagpanumpa kang Corro atubangan kang Judge Econg sanglit wala pa man hingpit nga giproklamar sa Comelec si Corro nga maoy mananaog.

Samtang giklaro ni Loot nga dungan sa ilang pagduso sa ilang motion for reconsideration mipasaka usab sila og kasong contempt of court batok kang Judge Marigomen tungod sa pag-isyu og writ of execution bisan pa man og dili final and executory ang desisyon sa Comelec.  – BANAT NEWS