Trabahante sa MEPZ gitulis

CEBU, Philippines - Ang misiaw nga mga tulisan sa dakbayan sa Lapulapu nakabiktima na usab og usa ka trabahante  sa Mactan Export Processing Zone (MEPZ) sa maong dakbayan sa miaging kaadlawon.

Ang biktima mao si Maricel Latraca, 26, lumad nga taga Baybay, Leyte, apan temporaryong nagpuyo sa sitio Pusok Cemento sa barangay Pusok sa nahisgotang dakbayan

Si PO2 Alexander Septimo nga nahinabi sa Banat News mibutyag nga gikan pa sa iyang trabaho sa MEPZ ang biktima ug naglakaw kining mipauli paingon sa iyang gipuy-an dihang duha ka wala hiilhing mga lalaking batan-on nga iyang nasugatan   kalit lang mition og kutsilyo kaniya ug mediklarar nga tulis.

Gisakiyo sa maong mga tulisan ang tulo ka cell phone sa biktima nga nagkantidad og P40,000 ug cash nga balig P3,000.

Human makuha ang cell phone ug salapi sa biktima mipahilayo dayon ang mga tulisan sa maong lugar. - Romeo T. Limpangog (BANAT NEWS)