Botos sa mga Sugbuanon importante sa kandidato

CEBU, Philippines - Opisyal sa Malacañang sa Sugbu mibutyag nga importante kaayo ang boto nga makuha gikan sa mga Sugbuanon alang sa usa ka kandidato sa pagka-pangulo sa nasud.

Si deputy spokesman Gary Olivar sa Malacañang dihang gipangutana sa usa ka sakop sa media atol sa 888 News forum nagkanayon nga ang Sugbu dunay dakong populasyon sa mga botante ug napamatud-an na kaniadto nga mao kini nakahatag og dakong botos sa kadaugan ni Presidente Gloria Macapagal Arroyo. Nagdumili hinuon kini paghatag og komentaryo kabahin sa padayong nangiwit sa ratings dinhi sa Sugbu ug ubang bahin sa Central Visayas si Lakas-Kampi presidential aspirant Gilbert "Gibo" Teodoro.

Matud pa ni Olivar nga dili siya maoy tigpamaba ni Teodoro apan bugtong niyang gipasalig nga suportado si Teodoro sa pangulo.

Si Teodoro base sa pinakaulahing survey anaa ra gyud sa 5 percent layo ra kaayo kun itandi ni Benigno “Noynoy” Aquino nga kanunay nag-una sa survey ug nakakuha og kapin sa 50 porsiyentong ratings.

Matud ni Olivar iyang awhagon ang administrasyon ug ingon man ang kampo ni Teodoro nga doblehon ang ilang paningkamot dinhi sa Sugbu ug ubang bahin sa Pilipinas aron mosaka ang ratings niini. - BANAT NEWS