Tawo gitagod-tagod

CEBU, Philippines - Usa ka patay'ng lawas sa lalaki nga brutal nga gitagod-tagod ang kalawasan ug ulo ang napalgan diha sa sapa sa sitio Kalinawan, barangay San Rafael-Tangke, dakbayan sa Talisay kagahapon sa buntag.

Ang patay'ng lawas gibana-banang nagpangidaron gikan 50 ngadto sa 60-anyos, 5’1 ngadto sa 5’2 ang height, tabunon ang pamanit ug semi-opaw ang tupi sa buhok.

Ang patay'ng lawas may tattoo nga letrang “PAL” sa ibabaw nga bahin sa iyang tuong bukton apan putol na ang maong bukton ug wala igkita, samtang nagkawil nalang ang ulo niini gikan sa liog ug daghang inagian sa tinigbasan ang ulo ingon man mga dapidapi.Sumala pang PO3 Mikie Espina, imbestigador sa Homicide Section usa ka Warlito Traso nga residente sa maong dapit maoy nakakaplag sa biktima samtang kini padulong manginhas.

Ang biktima gikatahong wala nay purol ug brief dihang nakaplagan gawas lang sa lima ka t-shirts nga gisapaw-sapaw niini nga kolor puti, maroon, brown, pink ug dirty white.

Sumala pang Espina sa pakighinabi sa Banat News posibleng sa laing dapit kini gipatay ug diha lang gilabay niadtong milabay'ng gabii.

Nagtuo usab ang kapolisan nga labihang sukoa sa mamumuno gumikan sa kagrabe sa pagtigbas sa lawas niini samtang gidudahan usab nga posibleng ‘kawatan’ ang biktima.

Sumala pa sa mga polis usa sa mga takuban sa susamang kriminal ang pagsapaw-sapaw og sinina aron dili daling matiman-an tungod sa gisuot.

Walay nakaila sa mga residente sa biktima kansang patay'ng lawas anha gibutang sa Saint Francis Funeral Parlor sa Bulacao sa dakbayan sa Talisay.   (BANATNEWS)