Nag-drive nga hubog tipi

CEBU, Philippines - Usa ka batan-on nga giingong hubog gikan namista ang namatay human mahagbong ang iyang gisakyang motorsiklo sa kanal kagahapon sa kaadlawon sa national road sa sitio Laray barangay Curva lungsod sa Medellin. Ang namatay giilang si Artemio Curva, 21, taga sitio Manoling barangay Caputatan Sur sa maong lungsod human makaangkon og grabeng kadaot sa kalawasan ug ulo.

Sumala pa sa report nga midangat sa Cebu Provincial Police Office operations section, nagmaneho ang biktima sa iyang motorsiklong may plakang 7L-5875 gikan sa sitio Navarra kay namista ug hubog kaayong mipauli nga nagmotor apan giingong kusog kaayo ang pagpadagan.

Gidudahang nalipat kini samtang nagmaneho ug natagak ang iyang motorsiklo sa usa ka kongkretong kanal ug didto na mapalgi. Usa ka Antonio Camelo nga nahiagi sa dapit maoy nakabantay sa motorsiklo ug sa patay'ng lawas ni Curva diha sa maong kanal hinungdan nga gipahibalo niini ang awtoridad.

Matud pa nga ang patayng’ng lawas niini ang nadat-ugan pa sa iyang motorsiklo diha sa nahagbungang kanal.

Sa gipahigayong autopsy sa municipal doctor sa lugar gikatahong namatay ang biktima gumikan sa pagdugo sa sulod sa lawas niini tungod sa kadaghan sa kadaot nga nahiaguman sa lawas ug ulo niini. – BANAT NEWS