Digal, Shimura: Pagbutang og polis, sundalo 'preemptive' measure lang

CEBU, Philippines - Ang pagpatigbabaw sa kahapsay ug kalinaw sa lungsod sa Daanbantayan ang tinguhang ipatigbabaw ni Mayor Sun Shimura bisan pa man sa nagkainit nga politika diha sa iyang lungsod.

Si Mayor Sun Shimura dihang nahinabi sa Banat News miingon nga ang pagpangayo niya og dugang polis gikan sa probinsya gitumong lang aron wala'y mahitabong kasamok.

Kini human mopahibalo ang iyang kaatbang nga si Engr. Augusto Corro ug bise mayor niini nga si Dr.Jose de Leon nga duna sila'y katungod nga molingkod sa munisipyo isip mananaog sa milabay'ng 2007 elections subay sa ruling nga gipagawas sa Commission on Elections First Division niadtong milabay'ng semana.

Ang kampo ni Shimura ug inahang si Vice Mayor Maria Luisa Loot gikatakdang mosang-at og motion for reconsideration karong semanaha aron pugngan ang pagpalingkod kang Corro ug de Leon.

Matud pa ni Shimura sa unang pakighinabi sa Banat News nga bugtong makapapahawa kanila mao ra ang writ of execution nga sila papahawaon ug palingkuron na ang duha ka mga kaatbang. Kini magagikan lamang sa Comelec en banc.

Apan si Corro dihang nakahinabi sa Banat News mipadayag nga natingala siya sa pagpadala og mga polis sanglit malinawon man ang ilang dapit. Sumala pa niya tuyo niyang molingkod sa pwesto sa malinawong pamaagi maong wala na kinahanglana ang dugang polis ug mga sundalo sa ilang dapit.

Samtang sa pakighinabi sa Banat News kang Chief Inspector Laurel Laurente, hepe sa kapolisan sa nahisgutang lungsod nga gipatuman nila ang mga checkpoints sa lungsod aron kapugngan ang posibleng mahitabong kasamok nga posibleng mugna sa duha ka habig.

Si Cebu Provincial Police Office director Sr. Supt. Erson Digal sa pakighinabi sa Banat News mipasabot nga dili overacting ang iyang pagpadala og dugang polis sa maong lungsod nga maoy paghulagway ni Corro sa iyang gihimo.

Matud pang Digal wala siya'y labot sa politikanhong kalihukan ug igo ra siyang mibuhat sa iyang trabaho, ang pagmentinar sa kahapsay ug kalinaw tunga-tunga niining tensyon sa duha ka mga politiko. – BANAT NEWS