Mandaue mananaog sa Skills Competition

CEBU, Philippines - Ang dakbayan sa Mandaue ug ang National Capital Region(NCR) maoy miguwang mananaog sa 8th National Skills Development and Competition nga gihimo niadtong Pebrtero 5 hangtod 10 niining tuiga didto sa dakbayan sa Naga.

Si Dante Infante nga maoy coach ug magtutudlo sa grupo sa mga tinun-an sa dakbayan sa Mandaue nakigtagbo kagahapon kang Mayor Jonas Cortes ug uban pang mga opisyal sa Mandaue ug maoy mipahibawo niini.

Ang maong indigay sa kaalam gipasiugdahan sa Technologist and Entepreneurs of the Philippines and Development of Education nga nagsentro sa tulo ka mga kategoriya.

Kini mao ang Industrial Technology, Agri Fisheries, Home Technology and Information, Communications Technology (IT) .

Ang mga contestant maoy mga mananaug sa division ug regional elimination ug ang 41 ka mga sakop sa delegasyon sa dakbayan sa Mandaue maoy nagrepresentar sa Central Visayas nga gipangulohan ni Reina Perez , ang principal sa Mandaue City Comprehensive National High School.

Giabagan usab siya ni Rosario Casaligan nga principal sa Mandaue City Science High School ug ni Myrna Tiu nga principal sa Subangdaku Technical Vocational High School.

Si Infante mipasabot nga ang Mandaue team maoy unang gideklarar nga champion apan ang National Capital Region miduso sa ilang motion for reconsideration hangtod nga migawas nga nagkatabla na ang duha ka grupo sa NCR ug dakbayan sa Mandaue isip overall champion sa maong kompitisyon sa tibuok nasud. (Romeo T. Limpangog)    (BANATNEWS)