BFAR mipasidaan batok sa El Niño

CEBU, Philippines - Mipasidaan ang kadagkuan sa Bureau of Fisheries and Aquatic Resources (BFAR)-7 ngadto sa mga fishpond operators nga kinahanglang magbantay sa posibling epekto sa nasinating mild El Niño phenomenon dinhi sa lalawigan ug ubang bahin sa Central Visayas.

Si Carolina Lopez ang hepe sa Fish Health Unit sa BFAR-7 nagkanayon nga hugot nilang gi-monitor ang kapin sa 40 ka mga fishponds sa lalawigan sa Sugbu.

Matud ni Lopez nga ang tinubdan ug gidaghanon sa tubig importante kaayo sa mga fishpond aron dili maapektuhan ang kalidad sa ilang mga isda.

Kinahanglang mohimo usab sila og mga adjustments sa ilang stocks o gidaghanon sa mga semilyang buhion tungod kay makaapekto kini sa tinubuan sa mga isda tungod sa taas ang temperatura sa tubig.

Giklaro hinuon ni Lopez nga hangtud karun wala pa sila’y nadawat nga impormasyon gikan sa mga fishpond operators dinhi sa lalawigan sa Sugbu ug ubang bahin sa rehiyon nga dunay nahitabong ‘fishkill.’

Mipasidaan si Lopez nga mas maayong mangandam gyud ang mga operators niining El Niño kay gikatahong molanat pa kini og pila ka buwan ang maong huwaw.   (Rey Pasaporte)    (BANATNEWS)