Proyekto gi-inugurahan ni Congressman PJ Garcia

CEBU, Philippines - Si Kongresista Pablo John Garcia (PJ) sa ikatulong distrito sa lalawigan sa Sugbo mi-turn-over sa duha ka mga inprastrakturang proyekto ngadto sa kagamhanan sa lungsod sa Barili human niya kini inugurahe sa miaging semana.

Ang maong mga proyekto nga gigastuhan sa iyang countrywide development assistance funds (CDAF) mao ang usa ka edipisyo nga may duha ka lawak klasehanan sa barangay Tubod, ug ang hanging foot bridge (HFB) nga nagdugtong sa mga barangay Poblacion ug sitio Kabulihan , barangay Santa Ana , sa maong lungsod.

Ang inugurasyon ug pag turn-over sa edipisyo sa eskuylahan sa Tubod, gitambungan nila ni Kapitan Aurelio Mabano sa Tubod, uban usab nila ni barangay konsehal Aida Balberona ug uban pang mga opisyal sa barangay, mga magtutudlo ug mga molupyo sa maong lugar.

Matud pa ni Mabano nga pinaagi sa bag-ong edipisyo sa eskuylahan, daghang mga estudyante ang mabulahan kay kaminusan na ang kahuot unya sa klase sa mga tinun-an sa ilang barangay.

Samtang ang giinugorahang HFB nga gagastuhan og P400 sa CDAF ni PJ maoy ikaduhang foot bridge nga natukod sa maong lungsod.

 Ang una mao ang anaa sa duol sa municipal abbatoir nga natarok sa panahon pa ni anhing mayor Bobby Alquizola, ang igsoon ni kandidato pagkakonsehal karon sa Barili nga si Rene Alquizola.

Gani dako og pagtuo ang Barilinhon nga bisan wala na si mayor Bobby, ang mga gibiling mithi niini alang sa Barilinhon ipadayon sa iyang igsoong si Rene.

Si Barangay Kapitan Maricon V. Dandan sa Santa Ana mapasalamaton kaayo kang PJ tungod kay pinaagi sa bag-ong foot bridge dali ug sayon nalang kaayo ang pag- adto sa Poblacion sa mga taga Sta Ana, ug dili na peligro ang paglabang sa maong lugar bisan sa mga batang gagmay.

Wala usab hikalimti ni Dandan ang saad ni PJ nga iyang ipariprap   sa sapa sa Santa Ana nga nakankan na pag-ayo sa baha nga naghatag og peligro karon sa dike sa Barili.

Mitambong usab sa maong inugurasyon ug turn-over ceremony sa maong mga proyekto sila si Mayor Teresito Marinas ug ang iyang kandidato sa pagka-bise mayor   Marlon Garcia ang igsuon ni Kongresista PJ ug si Rene Alquizola. (Wen Celen)    (BANATNEWS)