Biktima sa rape miduso'g mosyon

CEBU, Philippines - Usa ka estudyante sa nursing kinsa mikiha og pagpanglugos batok sa usa ka civilian asset sa National Bureau of Investigation (NBI)-7 miduso sa iyang motion for reconsideration niadtong Biyernes ngadto sa korte tungod sa dili makatarunganong pag-dismiss sa iyang kaso.

Sa napulo ka pahinang motion for reconsideration nga giandam ni Atty. Joan Saniel sa Children Bureau (CLB) ug gipasaka ngadto sa buhatan sa prosecutor sa dakbayan sa Talisay pabor sa kihante, gibatbat niini nga si prosecutor Hyacinth Jadraque nga maoy nagkupot sa maong kaso misipyat sa iyang paghatag og gibug-aton sa testimonya sa akusado nga usa ka enhinyerong asset sa NBI 7 kay sa testimonya sa kihante.

Ang giingong sipyat ni Jadraque nanukad sa iyang pag-absuwelto sa akusado niadtong Pebrero 9, 2010.

Ang biktima nagpanuigon pa og 16 dihang gilugos kuno siya sa asset sulod sa usa ka motel sa Talisay niadtong Oktubre 17, 2008.

Ang akusado matud pa sa kihante mihaylo kuno kaniya og scholarship grant sa iyang pagtungha sa Abellana National High School (ANHS) diin kini (akusado) maoy presidente niadtong higayona sa ANHS Association batch’ 79 (ANHSA 79ers).

Gipasabot sa maong mosyon nga kumo kay siya (akusado) maoy naggasto sa pagtungha sa kihante, gipahimuslan sab niini ang higayon pinaagi sa paglugos sa biktima.

Sa laing bahin ang akusado mipasangil sa pamilya sa biktima nga misuway unta kuno kini pagpangilkil og P3 milyones gikan kaniya, apan napakyas siya sa pagpakita og kamatuoran ug ebedensya sa maong pasangil.

Nasayran base sa mosyon sa kihante nga ang gibasihan sa akusado sa giingong tinguha sa pagpangilkil kaniya sa iyang (kihante) pamilya mao ang giingong pagpakig-estorya kaniya sa igsoon sa kihante kinsa nangutana kun gastohan ba niya kini hangtod nga mograduwar sa kursong nursing.

Dinhi ning bahina giingong gisandig sa prosecutor ang pag-absuwelto sa kaso nga gipasaka sa kihante tungod kay matud pa nagpakita ang iyang igsoon nga “helpless” o walay mahimo tungod sa pagka-adunahan sa akusado ug sa ka -impluwensado niini.

Sa mosyon sa kihante kini nagkanayon nga dili maayong hukman sa prosecutor ang reaksyon sa igsoon sa kihante kay wala siya makapangutana niini atol sa preliminary investigation.

Gawas ning mga sipyata, si Saniel nagkanayon nga aduna pay laing mga sipyat si Jadraque sa mga hukom niini nga iyang nakita.

Sa samang higayon miawhag usab ang kihante nga kinahanglang mo-inhibit si Jadraque sa paghusay sa maong kaso aron kalikayan ang mga pagduda nga bias ang iyang desisyon.    (BANATNEWS)